एजेन्सी । स्पेनिस क्लब बार्सिलोनाले आफ्ना मिडफिल्डर फिलिपे कौटिन्होलाई बेच्‍न चाहेको बताइएको छ । ब्राजिलियन मिडफिल्डरले पछिल्लो समय प्रिमियर लिग क्लबतिर चासो देखाएको बताइएको छ । कौटिन्हो सन् २०१९ पछि वायर्न म्युनिख गएका थिए । 

त्यसपछि उनको पछिल्लो समय प्रिमियर लिग क्लब जान चाहेको चर्चा चल्दै आएको छ । जसमा कौटिन्होले आर्सनलमा जान चासो देखाएको बताइएको छ । 

उनले आर्सनलमा जानका लागि पहिलो चरणको कुराकानी पनि गरिसकेको स्पोर्टसमा लेखेको छ । कौटिन्होका एजेन्टले आर्सनलसँग कुराकानी गरेको र बार्सिलोना उक्त सम्झौताका लागि राजी भएको पनि बताइएको छ ।

प्रिमियर लिग क्लब लिभरपुलमा उत्कृष्ट प्रदर्शन गरिरहेका कौटिन्होलाई बार्सिलोनाले सन् २०१८ मा अनुबन्ध गरेको थियो । उनी बार्सिलोनामा जम्‍न नसक्दा क्लबले जर्मन क्लबमा लोनमा पठाएको थियो । कौटिन्होले बार्सिलोनामा एक सिजन ५२ लिग खेल खेल्दै १३ गोल गर्न सफल भएका थिए ।