काठमाडौं । सुशील भट्टलाई लगानी बोर्डको सीइओ (प्रमुख कार्यकारी अधिकृत) नियुक्त गरेको विषयमा बालुवाटारमा चर्काचर्की परेको छ । मन्त्रिपरिषद्को सोमबार बसेको बैठकले भट्टलाई लगानी बोर्डको प्रमुख कार्यकारी अधिकृत (सीइओ) नियुक्त गरेको थियो ।

भट्टको नियुक्तिको विषयलाई लिएर पार्टी अध्यक्ष पुष्पकमल दाहाल प्रचण्ड र वरिष्ठ नेता झलनाथ खनाल प्रधानमन्त्री ओलीमाथि खनिएको स्रोतको दाबी छ ।

“आज पाँच बजेदेखि ६ बजेसम्म वार्ता भयो । वार्ताको सुरुआत एकदमै तनावपूर्ण बन्यो । भट्टलाई सीईओ बनाएको विषय गम्भीर रूपले उठायौं । उहाँले प्रतिवाद गर्नुभएन,” एक नेताले बाह्रखरीसँग भने, “उप्रान्त यस्तो नियुक्ति गर्दा पार्टीको परामर्शबिना, छलफलबिना, स्वीकृतबिना नगर्नुस् भन्यौं ।”

प्रधानमन्त्रीको यस्तै कार्यशैलीले समस्या निम्त्याएको ती सदस्यले जानकारी दिए ।