काठमाडौं । मलेसियामा एक नेपाली युवालाई कुटपिट गरेको भिडियो सामाजिक सञ्जालमा केहीदिनदेखि भाइरल भएको थियो । उक्त भिडियामा सेक्युरिटी गार्डको रुपमा कार्यरत एक युवालाई लगातार कुटपिट गरिरहेको देख्न सकिन्छ । तर उनलाई कुटपिट गर्ने व्यक्ति पनि नेपाली नै रहेको खुलेको छ ।
मलेसियास्थित नेपाली दूतावासले जारी गरेको विज्ञप्तिका अनुसार दुवैजना नेपाली हुन् ।
“दूतावासले आह्वान गरेअनुसार उक्त घटनाका पीडित र पिडक दुवैजना राजदूतावासको सम्पर्कमा आउनुभयो । दुवैजना व्यक्तिहरु नेपाली नागरिक भएको कुरा पुष्टि भएको छ । पीडित इस्लाम हुसेन नवलपरासी जिल्ला र पिडक राम गोपाल मुराउ कपिलवस्तु जिल्लाका स्थायी बासिन्दा हुन्,” विज्ञप्तिमा भनिएको छ ।
उनीहरु दुवैजना मलेसियामा अवैधानिकरुपमा बस्दै आएको खुलेको छ ।
उनीहरुका अनुसार भिडियोमा देखिएको घटना जुलाई ७ को हो । बिहान करिब १० बजेतिर क्वालालम्पुरमा रहेको एम थ्री मलमा घटना भएको हो । निजहरुमध्ये पीडित सेक्युरिटी गार्ड र पीडक सुपरभाइजर रहेको दूतावासले जनाएको छ ।
दूतावासको सम्पर्कमा आएका दुवैजनाले उक्त भिडियोमा देखिएका व्यक्तिहरु आफूहरु नै भएको बताएका छन् । कुटपिट गर्ने मुराउ मलेसियन प्रहरीसमक्ष उपस्थित भएका छन् ।