काठमाडौं । अमेरिकी विशिष्ठ व्यक्तिहरुका ट्विटर अकाउन्ट ह्याकरले हाइज्याक गरेको विषयमा अमेरिकी संघीय अनुसन्धान ब्युरो (एफबीआई) ले अनुसन्धान सुरु गरेको छ । बिटक्वाइन घोटालाका लागि ह्याकरले अर्बपति तथा प्रतिष्ठित व्यक्तिहरुको ट्विटर अकाउन्ट ह्याक गरेकाले विषयमा अनुसन्धान थालिएको एफबीआईले जनाएको छ ।
एफबीआईले भन्यो, "ट्विटर अकाउन्टहरु क्रिप्टोकरेन्सीको जालसाझी गर्न सम्झौता गर्न ह्याक गरिएकोजस्तो देखिन्छ ।" नागरिकहरुलाई सतर्क रहनसमेत एफबीआईले आग्रह गरेको छ ।
ट्विटर अकाउन्ट ह्याक हुनेमा अर्बपति इलोन मस्क, जेफ बेजोस् र बिल गेट्सजस्ता अर्बपतिहरु रहेका छन् । त्यसैगरी अमेरकी पूर्व राष्ट्रपति बाराक ओबामा, अमेरिकी राष्ट्रपतिका डेमोक्रेट उमेदवार जोइ बाइडेन र कान्या वेस्टलाइको खातामा झुटा ट्विटहरू राख्दै मानिसहरूलाई एक हजार डलरको क्रिप्टोकरेन्सी चन्दास्वरूप पठाउन भनिएको थियो ।
उबर र एपलजस्ता संस्थाहरुसमेत ह्याकरको आक्रमणमा परेका छन् । साइबर आक्रमण गरेर दुरुपयोग गरेका यी सबै ट्विटर खाताका दशौं लाख फलोअर्सहरु छन् ।
बिल गेट्सको ट्विटर अकाउन्टमा राखिएको ट्विटमा लेखिएको थियो, "मलाई सबैले अरूलाई दिन आग्रह गरेका छन्, र अहिले त्यो समय आएको छ । एक हजार डलर पठाउनुस् । म तपाईंलाई २,००० डलर पठाउँछु ।"
सो बिटक्वाइन खातामा अहिलेसम्म १ लाख डलर जम्मा भएको बताइएको छ । अकाउन्ट ह्याक भएको सम्बन्धमा ट्विटरले जुलाई २३ मा ब्रिफिङ गर्नुपर्ने संसदीय समितिले जनाएको छ । सिनेटको वित्त समितिले ट्विटरलाई ब्रिफिङका लागि बोलाएको हो । - बीबीसी