काठमाडौं । कोरोना भाइरसको स्रोत पत्ता लगाउन विश्व स्वास्थ्य संगठन (डब्लूएचओ)को टोली चीन गएको छ । 

समाचार संस्था रोयटर्सका अनुसार चीन गएको विशेषज्ञको समूहमा दुई सदस्य छन् । उनीहरुले चीनका वैज्ञानिकहरुसँग मिलेर अनुसन्धान गर्ने बीबीसीले जनाएको छ ।  

डब्लूएचओले सुरु देखि नै कोरोना भाइरसको उत्तपति कसरी भयो पत्ता लगाउन चीनलाई सहयोग गर्न आग्रह गर्दै आएको थियो । चीनको वुहान सहरस्थित एक मासु बजारबाट कोरोना भाइरसको उत्पत्ति भएको चीनले पनि स्वीकार गरिसकेको छ । 

यता अमेरिकी राष्ट्रपति डोनाल्ड ट्रम्पले भने चीनले ल्याबबाट कोरोना भाइरस उत्पत्ति गरेको आरोप लगाउँदै चिनिया भाइरस भन्दै आएका छन् । 

चीनले राजनीतिभन्दा पनि यथार्थ अध्ययन गर्ने हो भनेमात्रै अध्ययनमा सहयोग गर्ने सुरु देखि नै बताउँदै आएको थियो । कोरोना भाइरस जंगली जनावरको मासुबाट आएको हो वा घरेलु जनावरबाट टोलीले पत्ता लगाउन प्रयास गर्नेछ । 

हालसम्म विश्वमा एक करोड २१ लाख २ हजार ३२८ जनामा कोरोना संक्रमण देखिसकेको छ भने मृत्यु हुनेको संख्या ५ लाख ५१ हजार ४६ पुगेको छ ।