एजेन्सी । स्पेनिस ला लिगा अन्तर्गत शुक्रबार राति विभिन्न दुई खेल हुँदैछन् । खेलमा शीर्ष स्थानको रियल मड्रिडले १७ औँ स्थानको आलाभेससँग प्रतिस्पर्धा गर्दैछ । रियलको घरेलु मैदानमा हुने खेल नेपाली समय अनुसार राति १:४५ मा सुरु हुनेछ ।
आजको खेलमा जित निकाल्दै ला लिगाको उपाधि होडमा आफूलाई बलियो बनाउने मौका रियललाई छ । लिगमा ३४ खेल खेलेको रियल ७७ अंकसहित शीर्ष स्थानमा छ । एक खेल धेरै खेलेको बार्सिलोना ७६ अंकसहित दोस्रो स्थानमा छ ।
यो सिजन सुरुआती समयमा खराब प्रदर्शन गरेको रियल पछिल्लो समय उत्कृष्ट प्रदर्शन गर्दै आएको छ । लकडाउनपछि भएका सबै खेलमा रियलले जित निकाल्न सफल भएको छ । आजको खेलमा जित निकालेमा रियलले चार अंकको अग्रता पाउनेछ ।
यता आलाभेस रियललाई हराउँदै रेलिगेसन जोनमा पर्नबाट आफूलाई जोगाउने योजनामा छ । आज नै हुने अर्को खेलमा ग्रानाडाले रियल सोसिडाडसँग प्रतिस्पर्धा गर्दैछ । खेल नेपाली समय अनुसार राति ११:१५ मा सुरु हुनेछ ।