एजेन्सी । इटालियन सिरी ए फुटबलमा तेस्रो स्थानको इन्टर मिलान पराजित भएको छ । आइतबार राति भएको खेलम मिलान बोलोग्नासँग २-१ गोलले पराजित भएको हो ।
घरेलु मैदानमा सुरुआती अग्रता जोगाउन नसक्दा मिलान पराजित भएको हो । खेलको २२ औं मिनेटमा रोमेलु लुकाकुले गोल गर्दै मिलानलाई पहिलो हाफमा १-० गोलको अग्रता दिलाएका थिए ।
५७ औं मिनेटमा बोलोग्ना १० खेलाडीमा समेटिएको थियो । रोबर्टो सोरियानोले रातो कार्ड खाँदै मैदानबाट बाहिरिएपछि बोलोग्ना १० खेलाडीमा समेटिएको थियो । ७४ औं मिनेटमा मुसा जुवाराले गोल गर्दै खेल १-१ को बराबरीमा ल्याए । त्यसको तीन मिनेट नबित्दै एलेसान्द्रो बास्टोनिले दोहोर पहेँलो कार्ड खाएपछि मिलान पनि १० खेलाडीमा समेटिएको थियो ।
त्यसपछि मुसा बारोवले गोल गर्दै बोलोग्नालाई अग्रता दिलाए । उनले खेलको ८० औं मिनेटमा गोल गर्दै पाहुना टोलिलाई २-१ गोलको जित दिलाए ।
हारसँगै तेस्रो स्थानको मिलानले दोस्रो स्थानको लाजिओसँगको अंक दूरी घटाउने अवसर गुमायो । मिलानको ३० खेलबाट ६४ अंक छ । यता विजयी भएको बोलोग्नाको ४१ अंक जोड्दै तालिकाको नवौं स्थानमा उक्लिएको छ ।