काठमाडौं । लकडाउन खुकुलो बनेसँगै सार्वजनिक यातायातका साधन पनि सञ्चालन गर्न व्यवसायीले दबाब दिँदै आएका छन् । ट्याक्सी चालकहरुले त आन्दोलन नै गरिरहेका छन् ।
यातायात व्यवस्था विभागले पनि स्वास्थ्य सुरक्षालाई ध्यान दिँदै सरकारले बनाएको प्रोटोकल अनुसार सार्वजनिक यातायात सञ्चालन गर्न सकिनेसहितको सुझाव मन्त्रालयलाई बुझाएको पनि एक महिना भइसक्यो । तर, सार्वजनिक यातायात कहिले सञ्चालनमा आउँछ भन्ने विषयमा छलफल मात्रै भएको सरकारी अधिकारी बताउँछन् ।
“सुरक्षा सावधानी अपनाएर सार्वजनिक यातायातका साधन सञ्चालनका लागि मन्त्रालयमा पेस गरेको एक महिना भइसक्यो,” विभागका एक कर्मचारीले भने, “हामीले दिएको सुझावमा छलफल मात्रै भएको छ, फल आइसकेको छैन । सार्वजनिक यातायात कहिले सञ्चालनमा आउँछ थाहा छैन ।”
उनले सार्वजनिक यातायात सञ्चालनका लागि बनाएको प्रोटोकलअनुसार सार्वजनिक यातायात सञ्चालनमा ल्याउन सकिने दाबी गरे । तर, व्यवसायीले भने विभागले दिएको सुझावअनुसार गाडी चलाउन नसक्ने बताउँदै आएका छन् ।
नेपाल यातायात व्यवसायी राष्ट्रिय महासंघका अध्यक्ष योगेन्द्र कर्माचार्यले ५० प्रतिशत क्षमतामा मात्रै गाडी चलाउन नसकिने बताउँछन् । “गाडी चलाएपछि हाम्रो खर्च हुन्छ नै खर्च पनि नउठ्ने गरी गाडी चलाएर के गर्नु ?” उनले भने । निश्चित क्षमतामा गाडी सञ्चालन गर्दा लाग्ने खर्च सरकारले सहयोग गर्नुपर्ने उनको भनाइ छ ।
विभागले सार्वजनिक यातायातका साधन सञ्चालन गर्दा भौतिक दूरी कायम गर्नुपर्ने अर्थात् एक सिटमा एक जना मात्रै चढाउन पाउने, अनिवार्य मास्क लगाउने, स्यानिटाइजको प्रयोग गर्नेलगायतका व्यवस्था गरेको छ । तर, मन्त्रालयमा पठाएको सुझाव प्रतिवेदन एक महिना भइसक्दा समेत त्यसको अत्तोपत्तो नभएको विभागकै कर्मचारीले बताए ।
विभाग दिएको सुझाव मन्त्रीसमक्ष पेस भइसकेपछि मन्त्रिस्तरीय निर्णयबाट मात्रै सार्वजनिक यातायातका साधन सञ्चालन गर्न नसकिने र उच्चस्तरीय समितिमा छलफलका लागि गएको जानकारी मन्त्रीले गराएको एक कर्मचारीले बताए । “उच्चस्तरीय समितिमा पनि छलफल मात्रै हुन्छ, फल निस्किन सकेको छैन,” उनले भने ।
यता, विभागका प्रवक्ता तीर्थराज खनाल पनि यो विषय छलफलमै रहेको बताउँछन् । “हामीले मन्त्रालयलाई पनि सुझाव दिइसकेका छौं, छलफल भइरहेको होला । विभागले पनि छलफल गरिरहेको छ” उनले भने ।
विभागले सरकारलाई प्रोटोकलसहितको सुझाव दिएको र त्यसमा निर्णय हुन बाँकी रहेको उनले बताए । “प्रोटोकलका विषयमा यातायात व्यवसायीसँग पनि छलफल गर्नेछौं,” उनले भने ।