एजेन्सी । बुन्डेसलिगा च्याम्पियन बायर्न म्युनिखले सिजनको दोस्रो उपाधि जितेको छ । जर्मन कप (डिएफबी पोकल) अन्तर्गत शनिबार राति भएको फाइनलमा बायर लिलागीसेनलाई पराजित गर्दै बायर्नले सिजन २०१९/२० को दोस्रो उपाधि जितेको हो ।

बर्लिनमा भएको खेलमा बायर्नलाई ४-२ गोलको जित दिलाउन रोबर्ट लेवान्डोवस्किले दुई तथा डेभिड अल्ब र सर्जे ग्नाब्रीले एक/एक गोल गरे । लिभरकुसेनका लागि स्भेन बेन्डेर र कई हाभर्टले एक/एक गोल फर्काए ।

खेलको १६ औं मिनेटमा अल्बाले गोल गर्दै बायर्नलाई अग्रता दिलाएका थिए । त्यस्तै २४ औं मिनेटमा सर्जेले गोल गर्दै बायर्नको अग्रता दोब्बर पारे । उनले जोसुआ किमिचीको पासमा गोल गर्दै पहिलो हाफमा २-० गोलको अग्रता दिलाएका थिए ।

खेलको ६९ औं मिनेटमा लेवान्डोवस्किले गोल गर्दै बायर्नलाई ३-० को अग्रता दिलाए । त्यसको चार मिनेट नबित्दै लिभरकुसेनका एन्डेरले गोल गर्दै गोल अन्तर घटाउने प्रयास गरे । खेल सकिन एक मिनेट बाँकी हुँदा लिवान्डोवस्किले व्यक्तिगत दोस्रो गोल गर्दै बायर्नलाई ४-१ गोलको अग्रता दिलाए । तर खेलको इन्जुरी समयमा हाभर्टले पेनाल्टीमा गोल गर्दै खेल ४-२ को स्थितिमा ल्याए पनि हार टार्न भने सकेनन् ।

गतवर्षको समेत च्याम्पियन रहेको बायर्नले यस सिजनसहित २०औं पटक जर्मन कपको उपाधि जितेको छ । यता लिभरकुसेनले भने आफ्नो २७ वर्षपछि पनि इतिहास फर्काउन सकेन । लिभरकुसेनले पछिल्लो पटक सन् १९९३ मा जर्मन कपको च्याम्पियन बनेको थियो । त्यसयता लिभरकुसेनले २००२, २००९ र यस वर्ष गरि तीन पटक जर्मन कपको फाइनल खेलेको छ ।