काठमाडौं । स्थायी कमिटी बैठक दुई दिनलाई सरेपछि नेकपाका ६ जना सचिवालयका नेता बैठक बसेर पार्टी एकताका लागि अन्तिमसम्म सङ्घर्ष गर्ने निष्कर्ष निकालेका छन् ।

प्रधानमन्त्री तथा पार्टी अध्यक्ष केपी शर्मा ओली आफ्नो अडानमा यथावत रहेपछि पार्टी बचाउनुपर्ने दायित्व आएको एक नेताले बताए ।

शनिबार पार्टी अध्यक्ष पुष्पकमल दाहाल प्रचण्डको निवासमा झलनाथ खनाल, माधवकुमार नेपाल, वामदेव गौतम, रामबहादुर थापा बादल र नारायणकाजी श्रेष्ठसहितका नेता भेला भएका थिए ।

६ जना नेताको अनौपचारिक बैठकले स्थायी कमिटी बैठक नरोक्ने निष्कर्ष निकालेको एक नेताले बताए ।  “पार्टी कमिटी नै सर्वोपरी हो । कमिटीले जे फैसला गर्छ मान्नु हामी सबैको कर्तव्य हुनेछ । अहिले स्थायी कमिटीको बैठक रोकिएको छ । यसले समाधान दिँदैन, स्थायी कमिटीको बैठक अब नरोक्ने र त्यहीँबाट समाधान खोज्ने छलफल भयो,” ती नेताको भनाइ छ ।

अर्का सचिवालय सदस्यले पार्टी विभाजनतर्फ उन्मुख रहेको र संसद् अधिवेशन अन्त्यपछि जुनसुकै फेला फुटको बाटो समात्न सक्ने भएकाले यसलाई रोक्ने निर्णय गरेको जानकारी दिए ।

“पार्टी फुटबाट पनि रोक्ने र मिसन पनि पूरा गर्ने छलफल भएको छ,” उनले भने ।  पार्टी अध्यक्ष केपी शर्मा ओलीलाई कारबाही गरेर हटाउन समझदारी भएको हो भन्ने प्रश्नमा ती सदस्यले स्थायी कमिटीको निर्णय अन्तिम हुने र त्यसको पालना गर्ने बताए ।

“स्थायी कमिटीको बैठक चलिरहेको अवस्थामा बैठकबाहिर समाधान खोज्ने कुरा आउँदैन । बैठकलाई निर्णय गर्न दिऊँ भन्ने समझदारी भयो । बाँकी फैसला स्थायी कमिटीले गर्छ,” उनले भने । सचिवालयका ६ जना नेता बैठक बसेको कुरा वरिष्ठ नेता झलनाथ खनालले पनि पुष्टि गरे । उनले पार्टीलाई एकताबद्ध बनाउन छलफल भएको स्वीकार गरे ।

यसैबीच शनिबार बिहान खुमलटारमा प्रचण्ड र वरिष्ठ नेता माधव नेपालबीच पनि भेटवार्ता भएको थियो । भेटमा शुक्रबार दुई अध्यक्षबीच भएको कुराकानी प्रचण्डले ब्रिफिङ गरेको स्रोतले जानकारी दियो ।