काठमाडौं । आधा शताब्दीभन्दा बढी शत्रुतापूर्ण सम्बन्ध रहेका क्युबा र अमेरिकाबीच सम्बन्धमा सुधार हुन थाल्दा केही क्युबालीलाई भने पीर परेको छ । अहिले क्युबालीहरू जसरी भए पनि अमेरिका छिरे हुन्छ । उनीहरूसँग वैध आप्रवासीसरह व्यवहार गर्ने सन् १९६० ताकाको कानुन अझैसम्म खारेज भएको छैन । अरू मुलुकबाट त्यसरी गएमा भने अवैध आप्रवासी मानिन्छ । दुई देशबीच सम्बन्ध सुधार भएमा पुरानो कानुन खारेज हुने डरले अमेरिका जान चाहने क्युबालीलाई पिरलो थपिएको हो । यसैले अहिले हजारौं क्युबालीहरू बितेका दुई वर्षमा अमेरिका छिरिसकेका छन् र दिनहुँ लुकिछिपी अमेरिका छिर्नेहरूको संख्या बढिरहेको छ । 

उता क्युबा सरकारले अमेरिकाको खुकुलो नीतिका कारण क्युबालीहरू अवैधरूपमा अमेरिका जानेक्रम ह्वात्तै बढेकोमा  आइतबार चिन्ता प्रकट गरेको छ । रोयटरले जनाएअनुसार क्युबाले अमेरिकामाथि गैरकानुनी आप्रवासनलाई प्रोत्साहन दिएको आरोप पनि लगाएको छ ।  

अमेरिका जाने क्रममा कोलम्बिया पुगेका १४ जना क्युबालीहरूलाई फिर्ता पठाइएपछि क्युबा सरकारले आइतबार जारी गरेको विज्ञप्तिमा उनीहरूलाई 'आप्रवासनको राजनीतिकरण गर्ने अमेरिकी सरकारको गलत नीतिको पीडित' भन्दै अमेरिकी सरकारले 'असुरक्षित र अवैध आप्रवासन'लाई दुरुत्साहित गरेको आरोप लगाइएको छ । विज्ञप्तिमा यस्तो नीति सम्बन्ध सुधार गर्ने प्रकियासँग मेल खाँदैन ।

कोलम्बिया सरकारले एक हजार जनाभन्दा बढी क्युबाली अवैधरूपमा आफ्नो मुलुकमा पुगेको जनाएको थियो । क्युबालीहरू पहिले सजिलै पुगिने छिमेकी मुलुकहरूमा जाने र त्यहाँबाट मानव तस्करको सहयोगमा वा अरू उपायद्वारा अमेरिका छिर्ने गर्छन् । 

पिउ रिसर्च सेन्टरलाई उद्धृत गर्दै रोयटरले जनाएअनुसार सन् २०१६ मा ४६ हजार ५०० क्युबालीहरू भिसा नलिई अमेरिका पुगिसकेका छन् । सन् २०१५ मा यो संख्या ४३ हजार थियो भने २०१४ मा त २४ हजारभन्दा केही बढीमात्र थियो । 

अमेरिकी समुद्री सीमारक्षकहरूका अनुसार गत अक्टोबर यता कम्तीमा ५ हजार ७८६ क्युबालीहरूले समुद्री मार्गबाट अमेरिकाको दक्षिणी तटमा प्रवेश गर्ने प्रयास गरेका छन् भने सन् २०१५ मा यो संख्या ४ हजार ४७३ मात्र रहेको पनि रोयटरले जनाएको छ ।