काठमाडौं । केही दिन पहिले पाकिस्तानको इस्लामावादमा आयोजित दक्षिण एसियाली सहयोग संगठन (सार्क)का गृहमन्त्रीहरूको बैठकको समाचार संकलन गर्न गएका भारतीय पत्रकारहरूलाई बैठक स्थलमा प्रवेश गर्न नदिएको खुलासा हफिङटन पोस्टले सोमबार गरेको छ । 

भारतीय पत्रकारहरूलाई उद्घाटन समारोहमा समाचार संकलनमा त रोक लगाइयो नै गृह मन्त्री राजनाथ सिंहको स्वागतको तस्बिर खिच्नसमेत रोकिएको थियो । भारतीय गृह मन्त्री सिंहसँग भारतबाट ६ जना पत्रकार इलास्माबाद पुगेका थिए । 

गृह मन्त्रीहरूको बैठकको उद्घाटन पाकिस्तानका प्रधानमन्त्री नवाज सरिफले गरेका थिए । हफिङटन पोस्टका अनुसार पाकिस्तानका गृह मन्त्री निसार अलि खानले भारतीय समकक्षीको स्वागत गर्ने बेलामा पत्रकारहरू तस्बिर लिन तम्तयार भएपछि भारतीय पत्रकारलाई हटाउन खोजिएको थियो । भारतीय कूटनीतिकले विरोध गरेपछि सादा पोसाकका प्रहरीले उनीहरूका क्यामरा छेकिदिएका थिए । 

यसैगरी हफिङटन पोस्टले पाकिस्तानी अधिकारीहरूले गृह मन्त्री राजनाथ सिंहका बैठक चल्दै गर्दा ८ पटक शौचालय गएर भारतमा फोन गरेको प्रचार गराएको तर सिंह दुई पटकमात्र शौचालय गएको र सेल फोन लिएर नहिँड्ने दाबी गरेको छ ।

पाकिस्तानबाट प्रकाशित हुने समाचार पत्र डनले भने भारतीय गृह मन्त्रीले पाकिस्तानी समकक्षीसँग भनाभन भएपछि बीचैमा बैठक छाडेर हिँडेको जनाएको छ । 

भारतीय गृह मन्त्री सिंह पाकिस्तानी समकक्षीबाट आयोजित दिवा भोजमा पनि सामेल नभएको समाचार यस अघि नै सार्वजनिक भइसकेको छ ।