एजेन्सी । बलिउड अभिनेता अक्षय कुमार फोर्ब्स म्यागजिनको विश्वका सबैभन्दा बढी पारिश्रमिक बुझ्ने सेलिब्रिटीको सूचीको १०० भित्र पर्न सफल भएका छन् ।

भारतीय ३६६ करोड कमाइका साथ फोर्ब्सको यस सूचीमा पर्न सफल अक्षय एकमात्रै बलिउड सेलिब्रिटी हुन् । यो २०१९ को जुनदेखि २०२० को मेसम्मको करअगावैको उनको कमाइ हो ।

हलिउड सेलिब्रिटीहरू जेनिफर लोपेज (५६), विल स्मिथ (६९), रिहाना (६०), ज्याकी च्यान (८०) लगायत चर्चित सेलिब्रिटीहरूलाई उछिनेर यस सूचीको ५२औं स्थानमा पर्न सफल भएका हुन् । 

यद्यपि अघिल्लो वर्षको तुलनामा यो वर्ष उनको यस सूचीमा स्थान खस्किएको हो । अघिल्लो वर्ष भारतीय ४९० करोडको कमाइसहित उनी ३३औं स्थानमा पर्न सफल भएका थिए । 

फोर्ब्सका अनुसार कोरोनाभाइसका कारण विश्वभरका सेलिब्रेटीहरूको कमाइमा असर परेको छ । फोर्ब्सका अनुसार एमेजोन प्राइमसँगको सहकार्यमा तयार भएको अक्षयको पहिलो सिरिज ‘द एन्ड’ को कमाइका कारणले पनि अक्षय यस सूचीभित्र पर्न सफल भएको अनुमान गरेको छ ।

खबरका अनुसार एमेजोनले अक्षयसँग यस टीभी सिरिजका लागि करिब भारतीय ७५ करोडमा सम्झौता गरेको हो । यसका साथै अक्षयको आगामी चलचित्र ‘बेल बटम’ र ‘बच्चन पाण्डे’ को कमाइको अनुमानित कमाइलाई पनि फोर्ब्सले जोडेका छन् ।

यस सूचीको उत्कृष्ट १० भित्र काइली जेनर, क्रिस्टियानो रोनाल्डो, लियोनल मेसी, नेमार, टेलर पेरी, कान्ये वेस्टलगायत सेलिब्रिटीहरू पर्न सफल भएका छन् । यद्यपि काइलीलाई केही दिनअघि मात्रै फोर्ब्सले यो सूचीबाट हटाइसकेको छ । (न्युज १८)