पोखरा । प्रदेश स्वास्थ्य निर्देशनालय र जिल्ला स्वास्थ्य कार्यालयको मिस कम्युनिकेसनका कारण पर्वतका कोरोना संक्रमित गाउँ छिर्नबाट मुस्किलले बचेका छन् ।

पर्वतमा बिहीबार विहादी गाउँपालिकाका दुईजना र फलेवास नगरपालिकाका दुईसहित थप चारजनामा कोरोना संक्रमण पुष्टि भएको छ । यस्तै, गत मंगलबार फलेवास नगरपालिका २ र महाशीला गाउँपालिकाका तीनजनामा कोरोना संक्रमण पुष्टि भएको थियो ।

गत शनिबार ४१ जनाको स्वाब संकलन गरिएको थियो । तीमध्ये २२ जनाको रिपोर्ट मंगलबार आयो । मंगलबारको रिपोर्टमा पाँचजना संक्रमित भएको पुष्टि भएको थियो । बाँकी १९ जनाको भने रिपोर्ट आएको थिएन । तर, पाँचजनामा कोरोना पुष्टि भएपछि बाँकी ३६ जनाको नेगेटिभ आएको भन्ने बुझाइ स्वास्थ्य कार्यालयको रह्योे ।

त्यसपछि स्वास्थ्य कार्यालयकै रोहवरमा कुश्मास्थित होटल वन्दना र ब्लु एञ्जलमा क्वारेन्टाइनमा राखिएका व्यक्तिलाई जीप चढाएर गाउँ पठाइयो । प्रहरी र स्वास्थ्यका कर्मचारीले ३२ जनालाई घर फर्काएको थियो । 
तर, पछि स्वाब लिइएका सबैको रिपोर्ट आइनसकेको भन्ने पुष्टि भयो । स्वास्थ्य कार्यालयले घर पठाएका ३२ जनालाई आधा बाटो बाटै पुनः कुश्मा फर्काएर क्वारेन्टाइनमा राखियो । रिपोर्ट आउन बाँकी रहेकैमध्येबाट बिहिबार थप ४ जनामा कोरोना संक्रमण पुष्टि भयो । 

बिहादीका ११, फलेवासका ८, कुश्माका ६, महाशिला र पैंयुका ३÷३ जना र मोदीका एकजना घर जाने सूचीमा थिए । सबैलाई पठाउने तयारी भए पनि स्वाब परीक्षण नभएकालाई पनि घर पठाएको गुनासो आएपछि उनीहरूलाई मल्याङ्दीखोलाबाट फर्काइएको थियो ।

यता, जिल्ला अस्पताल पर्वतका निमित्त मेडिकल सुपरिटेन्डेन्ट डा. शिशिर देवकोटाले मिस कम्युनिकेसनका कारण यस्तो घटना भएको बताउँछन् ।

“प्रदेशका ५ जनाको पोजेटिभ आयो भनेर मेल आयो । हामीले कुल ४१ जनाको स्वाब संकलन गरेका थियौँ । ५ जनाको पोजेटिभ आएपछि बाँकीको नेगेटिभ आएछ भन्ने सोच्यौँ । भोलिपल्ट मैले सम्पर्क गर्दा २२ जनाको परिक्षण गरिएको र अन्य बाँकी रहेकोे भन्ने जानकारी भयो । हामीले गाउँ फर्काएका अन्य व्यक्तिलाई तुरुन्तै फर्कायौँ । यो सामान्य मानवीय गल्ती भएको हो । पहिले एकमुष्ट आउँथ्यो । हामीले ४१ जना मध्ये थाहा नपाएको भन्ने भयो ।” उनले भने ।

बिहीबार पुष्टि भएका चार जनासहित गत शनिबार स्वाब लिइएका सबैको रिपोर्ट आएको उनले बताए । उनी जिल्लास्थित कोभिड १९ क्राइसिस म्यानेजमेन्ट सेन्टर (सीसीएमसी) का सदस्य–सचिव समेत हुन । “अब, ४१ मध्ये बाँकी १९ जनाको पनि रिपोर्ट आएको छ । आज आएको रिपोर्टमा ४ जनामा संक्रमण पुष्टि भएको छ भने अन्यको नेगेटिभ आएको छ ।” उनले भने ।

यस्तै पर्वतमा नौजना कोरोना संक्रमित भए पनि ११ जनालाई कोरोना विशेष अस्पतालको आइसोलेसनमा भर्ना गरिएको छ । एउटै होटेल, क्लोज रुममा बसेका कारण संक्रमण पुष्टि नभएका दुई जनालाई पनि आइसोलेसनमा राख्नुपरेको डा. देवकोटाको भनाइ छ ।

“संक्रमण नभएकालाई पनि आइसोलेसनमा राखिएको छ । एउटै कोठामा ५÷६ दिन सँगै बसेको, क्लोज रुम छ । एउटै कोठामा बसेको छ, सँगै छन, भनेपछि उच्च जोखिममा रहेको भन्दै आइसोलेसनमा राखेका हौँ । गुप्तेश्वर बहुमुखी क्याम्पसमा बनाइएको कोरोना विशेष अस्पतालको बाहिरपट्टिको कोठामा राखेका छौँ । मंगलबार भेटिएका पाँच जनासहित अहिले ११ जनालाई आइसोलेसनमा राखेका छौँ । तीमध्ये २ जना उच्च जोखिममा हुनुहुन्छ । नौ जनाचाहिँ संक्रमित हुनुहुन्छ,” उनले भने ।

अहिले पर्वतमा भारतबाट आएका १२९ जनाको स्वाब परिक्षण गर्न बाँकी छ । दुई होटेलसहित सदरमुकाम कुश्मास्थित शिवालय माविलाई क्वारेन्टाइन बनाइएको छ ।