अर्को जिल्लाबाट बजारमा बेच्न लगिएको तरकारी स्थानीय तहका प्रतिनिधि र सरकारी कर्मचारीकै अगुवाइमा कोरोनाभाइरस नियन्त्रणका नाममा नष्ट गरिएका मूर्खतापूर्ण घटना सार्वजनिक भएका छन् । यस्तै देखेर चितवनलगायत विभिन्न जिल्लाका किसानले लहलहाउँदो तरकारी खेतमै जोतेर नष्ट गरेको हुनुपर्छ । अर्घाखाँचीको सन्धिखर्कमा कपिलवस्तुबाट विक्रीका लागि लगिएको तरकारी स्थानीय प्रशासनको हस्तक्षेपपछि नष्ट गरियो भने कास्कीको पोखरा महानगरपालिकामा पनि काभ्रे र चितवनबाट लगिएको तरकारी खाडलमा पुरेर नष्ट गरियो । विडम्बना, तरकारीबाट कोरोनाभाइरसको संक्रमण हुने अहिलेसम्म पुष्टि भएको छैन । दुर्भाग्य, कास्की र अर्घाखाँची दुवै जिल्लामा स्थानीय तह र जिल्ला प्रशासनका प्रतिनिधि सम्मिलित बैठकले नै बाहिरबाट तरकारी ल्याउन नदिने निर्णय गरेको रहेछ । भारतबाट भने नेपालमा तरकारी निर्बाध आयात भइरहेको छ ।  

‘‘पोहोर मूल्य पाइएन यस वर्ष त बेच्नै पाइएन’’ बारीको तरकारी मल बनाउन लागेको चितवनका किसानको यस भनाइले नेपालका किसानहरूको प्रतिनिधित्व गर्छ । तर, तिनै किसानको प्रतिनिधित्व गर्नेहरूले भने यस अभिव्यक्तिको मर्म कहिल्यै बुझेनन् । गएको वर्षसम्म नबिके पनि, मूल्य नपाए पनि सरकारसँग किसानको धेरै गुनासो हुँदैनथियो । कहिले समयलाई कहिले भाग्यलाई दोष दिन्थे । यो सरकारको अविवेक निकै भयावहरूपमा प्रकट भएको छ । हिउँदे तरकारी उत्पादन हुने बेलामा कोरोनाभाइरसको संक्रमणले संसारलाई नै आक्रान्त बनायो । संक्रमण रोक्न विश्वभरजस्तै नेपालमा पनि बन्दाबन्दी (लकडाउन) को विधि अपनाइयो । तर, अरू धेरै मुलुकमा बन्दाबन्दीले मर्का गरेका किसान, उद्यमी, व्यापारीलगायत सबैलाई राज्यले सहायता गरेकाले जीवन अपेक्षाकृत सहज भयो भने नेपालको सरकार तमासा हेरेर बसेको छ ।

भोकै सडकमा मर्दा वा राज्यकै क्वारेन्टिनमा विनाउपचार मर्दा वा मरेको केही दिनपछि मात्र कोरोनाभाइरस परीक्षणको नतिजा सुनाइँदासम्म पनि नेपाली जनताले सहेर बसेका छन् । तर, अब त अति हुँदैछ । केन्द्र सरकारको संवेदनहीन मूर्खताले नेपाली जनता कोरोनाभाइरसले भन्दा बढी उत्पीडित त भएकै छन् । स्थानीय तह र प्रशासनमा रहेकाहरूको मूर्खताले  पीडा थपिदिएको छ । सरकारकै कृषि तथा पशुपंक्षी मन्त्रालयले सूचना नै जारी गरेर कृषि उपज नष्ट नगर्न भनेको छ । हुन पनि तरकारीबाट कोरोनाभाइरस सर्ने अहिलेसम्म पुष्टि भएको छैन । यसैले बाहिरबाट तरकारी ल्याउन नदिने निर्णय मूर्खता हो भने नष्ट गर्ने कार्य अपराध हो । यसबाट नागरिकको व्यवसाय गर्ने र सम्पत्तिको हक हनन भएको छ । यसैले पोखरा र सन्धिखर्कमा तरकारी नष्ट गर्ने अविवेकी जनप्रतिनिधि र कर्मचारीलाई कारबाही गरेर उनीहरूबाट नष्ट भएको बिगो असुल गरी सम्बन्धित व्यक्तिलाई दिलाउनुपर्छ । नत्र, कृषि तथा पशुपंक्षी मन्त्रालय पनि यस मूर्खतापूर्ण अपराधको मतियार ठहरिनेछ र यस्तो मूर्खतापूर्ण अपराध अन्यत्र पनि दोहोरिनेछ ।