जनकपुर । सोमबार कोरोना भाइरस संक्रमण पुष्टि भएको धनुषाका तीन जनामा नगराइनस्थित फुलगामा प्रहरी चौकीका असई, प्रहरी जवान र दिल्लीबाट फर्केका एक युवक छन् ।
सीमा क्षेत्रको सुरक्षामा परिचालित सुरक्षाकर्मी कोरोना संक्रमणको दृष्टिकोणले अत्यन्तै जोखिममा छन् । सोमबार आएको रिपोर्टले जोखिमको पुष्टि गरेको छ । चौकीका इन्चार्जसमेत दुई जना सुरक्षाकर्मीमा संक्रमण पुष्टि भए लगत्तै दुवै जनालाई जनकपुरस्थित आइसोलेसनमा ल्याएर उपचार थालिएको छ भने उक्त चौकीमा रहेका बाँकी सबै सुरक्षाकर्मीलाई क्वारेन्टाइनमा राखिएको जिल्ला प्रहरी कार्यालयका प्रवक्ता डीएसपी रामेश्वर कार्कीले जानकारी दिए ।
इन्चार्जलाई आइसोलेसनमा र अन्य सुरक्षाकर्मीलाई क्वारेन्टाइनमा राखिएपछि रिक्त भएको प्रहरी चौकीको जिम्मेवारी सम्हाल्न सोमबारै जिल्लाबाट एउटा टोली परिचालन गरिएको कार्कीले बताए ।
चौकीको भवन र भौतिक संरचनामा कोरोना भाइरसको संक्रमण हुन सक्ने आशंका भएकाले तत्काल निर्मलीकरण गरिरहेको र चार दिनसम्म खाली छोडेपछि पाँचौं दिनदेखि मात्र त्यसमा सुरक्षाकर्मी बस्न थाल्ने उनले बताए ।
सोमबार फुलगामा पुगेको सुरक्षाकर्मीको अर्को टोली तत्काल फुलगामास्थित कृषि सेवा कार्यालयमा बसेर सुरक्षा कार्यमा खट्ने नगराइनका नगर प्रमुख परमेश्वर यादवले जानकारी दिए ।
तेस्रो संक्रमित नगराइन नगरपालिका–३ फुलगामा घर भएका ३० वर्षीय एक युवक छन् । उनी दुई साता अगाडि दिल्लीबाट गाउँ फर्केका थिए । दिल्लीस्थित छापाखानामा काम गर्ने ती युवकलाई पनि जनकपुरको आइसोलेसनमा राखेर उपचार थालिएको डीएसपी कार्कीले जानकारी दिए । योसँगै धनुषामा संक्रमितको संख्या ११ पुगेको छ ।
प्रदेश २ मा सोमबारमात्रै संक्रमितको संख्या ५४ जना थपिएको छ । रौतहटमा २६, बारामा २३, धनुषामा ३ र सप्तरीमा २ जना थपिएका हुन् । बाराको गढीमाई नगरपालिकामा एकै दिन २१ जना र रौतहटको राजपुर नगरपालिकामा पनि सोही संख्यामा थपिएका छन् । यसअघि प्रदेश २ मा संक्रमितको संख्या १ सय ७८ थियो । सोमबार दिउँसोसम्म प्रदेश २ मा संक्रमितको कुलसंख्या २३२ पुगेको छ ।