काठमाडौं । त्रिवि शिक्षण अस्पताल महाराजगन्जमा आज (सोमबार) पीसीआर परीक्षण ल्याब स्थापना गरिएको छ ।
राष्ट्रिय जनस्वास्थ्य प्रयोशालाका निर्देशक डा. रुना झाले ल्याब पूर्ण क्षमतामा सञ्चालन गर्न आग्रह गरिन् । नेपालमा कोरोना संक्रमणको दर बढ्दो क्रममा रहेकाले परीक्षणको दायरा पनि बढाउन पूर्ण क्षमतामा ल्याब सञ्चालन गर्न उनको आग्रह थियो । अस्पतालका कर्मचारीलाई तत्काल तालिम दिएर परिचालन गरिने झाले बताइन् ।
त्रिभुवन विश्वविद्यालयका उपकुलपति डा. धर्मकान्त बास्कोटाले एक ‘सिफ्ट’ मा ९६ जनाको स्वाब परीक्षण गर्ने क्षमताको ल्याब स्थापना भएको बताए । अहिले पूरा क्षमतामा ल्याब सञ्चालन गरी परीक्षणको दायरा बढाउनुपर्ने दायित्व भएको उनको भनाइ छ ।
योसँगै देशभर पीसीआर परीक्षणका लागि १७ ल्याब सञ्चालनमा आएका छन् । संक्रमितको संख्या बढिरहेको अवस्थामा परीक्षणको दायरा बढाउन यसले अझ सहयोग पुग्नेछ । त्रिविसँग तीनवटा पीसीआर मेसिन छन् । त्रिविले देशभरि रहेका आफ्ना भौतिक संरचनाहरू आवश्यक परे प्रयोग गर्न पनि तीनवटै तहका सरकारसँग आग्रह गरेको छ । 
तस्बिरहरु : स्वास्थ्य तथा जनसंख्यामन्त्री भानुभक्त ढकालका प्रेस सल्लाहकार माधवप्रसाद तिवारी ।
