काठमाडौं । आज यो वर्षकै गर्मी दिन भएको मौसम पूर्वानुमान महाशाखाले जनाएको छ । काठमाडौं लगायत धेरै स्थानहरुमा अधिकतम तापक्रम यो वर्षकै उच्च रहेको महाशाखाले जनाएको हो ।
महाशाखाका अनुसार आइतबार काठमाडौंको तापक्रम ३१ दशमलब ८ डिग्री सेल्सियस मापन गरिएको छ । त्यसैगरी दिपायलमा ४० डिग्री सेल्सियस पुगेको छ भने धनगढीको तापक्रम ४० दशमलब १ डिग्री सेल्सियस पुगेको छ ।
नेपालगन्ज, भैरहवा, विरेन्द्रनगर, दाङ, सिमरा, जनकपुरलगायतका केही स्थानहरुमा ३५ डिग्री सेल्सियस अथवा सोभन्दा माथि अधिकतम तापक्रम मापन गरिएको मौसम पूर्वानुमान महाशाखाले जनाएको छ ।
वर्षाको सम्भावना, सतर्क रहन आग्रह
कास्की, पर्वत आसपास विकसित मौसमी प्रणाली फैलँदै पूर्वतिर सर्ने क्रममा हाल चितवन, नवलपरासी , काठमाडौं र आसपासमा पुगेको महाशाखाले जनाएको छ ।
महाशाखाका अनुसार यो प्रणालीले हावाहुरीसहित हल्का क्षणिक वर्षासमेत गराइरहेको छ । केही समयमा मेघ गजर्नसमेतको सम्भावना रहेकाले सामान्य सतर्क रहन आग्रह गरिएको छ ।