विराटनगर । भारतले लकडाउन खुकुलो गरेको छ । रेल र यातायातका साधन खुला भएका छन् । यातायातका साधन सञ्चालनमा आएसँगै भारतसँग सीमा जोडिएका प्रदेश १ का नाकाबाट नेपाली भित्रने क्रम पनि बढेको छ ।
प्रदेश १ का नाकाहरूबाट कतिपय मानिस नेपाल प्रवेश गरिसकेका छन् । पारि भारतमा पनि प्रतीक्षारत छन् । कतिपयलाई भने सरकारकै पहलमा होल्डिङ एरिया तथा क्वारेन्टाइनसम्म लगि सकिएको छ ।
प्रदेश सरकारले करिब १० हजार मानिस पश्चिम–बंगाल र बिहारसँग जोडिएका नेपाली सीमा क्षेत्रबाट नेपाल प्रवेश गर्ने अनुमान गरेको छ । तर, केही दिनयता विभिन्न सीमानाकामा थुप्रिएका दुई हजार मानिसमध्ये केही नेपाल आइसकेका छन् । अरू नेपाल–भारत सीमामा स्वदेश फर्कने आशमा पालो कुरेर बसेका छन् ।
प्रदेश १ का सामाजिक विकास मन्त्रालयले यसरी नेपाल प्रवेश गर्ने १० हजार मानिसमा पीसीआर विधिबाट कोरोना भए नभएको परीक्षण गर्ने तयारी गरिसकेको छ । सामाजिक विकासमन्त्री जीवन घिमिरे भन्छन्, “दश हजारजति मानिस आउने अनुमान गरिएअनुसारै परीक्षणको दायरा पनि बढाउने तयारी गरिएको हो ।”
सुरक्षा निकायले आफ्ना समयन्त्रमार्फत संकलन गरेको तथ्यांकअनुसार दुई हजार नेपाली प्रदेश १ को सीमासम्म आइपुगेका छन् । तीमध्ये ७ सयभन्दा धेरैलाई होल्डिङ एरिया र क्वारेन्टाइनमा लगिएको छ । केही दिनअघि झापाको कचनकवलबाट नेपाल छिरेका मानिसहरूमा क्वारेन्टाइन स्थलमै परीक्षण गर्दा कोरोना देखिएको थियो । उनीहरूको विराटनगरमा उपचार भइरहेको छ ।
प्रदेश १ प्रहरी कार्यालयको तथ्यांकअनुसार हालसम्म दुई हजारजति मानिस झापा, मोरङ, सुनसरी र इलामको नाकासम्म आईपुगेका छन् । रेल चल्नेदर भारतमा अझ बढेसँगै थप मानिस बढ्ने र यो क्रम केही दिनसम्म चल्ने कार्यालयले जनाएको छ ।
प्रदेश प्रहरीको तथ्यांकअनुसार जम्मा एक हजार नौ सय ४८ जना सीमासम्म आइसकेका छन् । झापाको विभिन्न नाकामा सबैभन्दा धेरै १४ सय ३० जना, मोरङतर्फ ३ सय ४१ जना, सुनसरीतर्फ ११४ र इलाममा ६३ जना छन् । तीमध्ये पुरुष १५ सय २४, महिला ४१० र बालबालिका १४ जना छन् । सरकारले तयार गरेका होल्डिङ एरिया र क्वारेन्टाइनमा ७ सय १८ जनालाई राखिएको छ ।
प्रदेश १ का काँकडभिट्टा र जोगबनी नाकाबाट आउने मानिसको संख्या बढ्दो क्रममा छ । केही दिनअघि भारतको महाराष्ट्रलगायत क्षेत्रबाट बस चढेर आएका तीन सय जति मानिस जोगबनी क्षेत्रमा छन् । मोरङका साना नाकाहरू तर्फबाट आउन खोज्ने मानिसहरूसमेत प्रतीक्षामा छन् । प्रदेश प्रहरी कार्यालयका प्रवक्ता (डीएसपी) सुमनकुमार तिम्सिनाले भने, “मानिसहरू भारत सीमासम्म आउने क्रम दिनहुँ बढ्दो छ । हाम्रा कार्यालयहरूबाट सीमामा आउने मानिसको विवरण अद्यावधिक गरिरहेका छौं ।” प्रवक्ता तिम्सिनाले मानिसहरू नेपाली सीमातर्फ आउने क्रम अझै केही दिनसम्म जारी रहने बताए ।
प्रदेश १ सरकारका प्रवक्ता तथा आन्तरिक मामिलामन्त्री हिक्मतकुमार कार्कीले भारतबाट आउने मानिस अन्यत्रभन्दा यो प्रदेशमा कम हुने सरकारको आकलन गरिएको बताउँदै भने, “सीमासम्म आएका मानिसहरूलाई नेपालतर्फका होल्डिङ एरियामा राख्ने, स्वास्थ्य परीक्षण गर्ने र सम्बन्धित पालिकाकाका क्वारेन्टाइनमा पठाउने नै सरकारको रणनीति हो । तर, संक्रमण देखिए सरकारले तयार गरेका अस्पतालमा उपचार गर्न पठाउँछौं ।” मन्त्री कार्कीले प्रदेश १ का सीमामा अन्य प्रदेश जानुपर्ने नेपालीहरूसमेत आएको बताएका छन् ।
प्रदेश सरकारले संक्रमण फैलावटको तथ्यलाई हेरेर प्रदेशभर ४० हजार जनामा परीक्षण गर्ने तयारी गरेको छ । होल्डिङ एरिया १५ हजार जना अटाउन सक्ने गरी तयार गरिएको छ । यसैगरी आइसोलेसनको शय्या थप्न सरकारले काम थालिसकेको छ ।