काठमाडौं । स्वास्थ्य तथा जनसंख्या मन्त्रालयका कर्मचारीहरुको कोरोना परीक्षण गरिने भएको छ । स्वास्थ्य सेवा विभागका चिकित्सक गत जेठ ६ गते कोरोना संक्रमण देखिएको थियो ।
ती चिकित्सकको कन्ट्याक ट्रेसिङमा परेका मन्त्रालयका कर्मचारीहरुको आइतबार कोरोना परीक्षणका लागि नमुना संकलन गरिएको मन्त्रालयका सह प्रवक्ता डा. समीरकुमार अधिकारीले जानकारी दिए । उनले भने, “कोरोना संक्रमण देखिएका चिकित्सकको सम्पर्कमा आएका मन्त्रालयका कर्मचारीहरुको कोरोना परीक्षणका लागि आज स्वाब संकलन हुँदैछ ।”
ती चिकित्सक जेठ ५ गतेको मन्त्रालयको हेल्थ इमर्जेन्सी अपरेसन सेन्टरमा आयोजित बैठकमा सहभागी थिए । उक्त बैठकमा रहेका करिब २० जना कर्मचारीहरुले समेत कोरोना परीक्षणको माग गरेका छन् ।