काठमाडौं । कोरोना भाइरसको संक्रमण हालसम्म सबैभन्दा बढी प्रदेशमा ५ मा देखिएको छ ।
स्वास्थ्य तथा जनसंख्या मन्त्रालयका सह–प्रवक्ता डा. समीरकुमार अधिकारीले अहिलेसम्म सबैभन्दा बढी कोरोना संक्रमण प्रदेश ५ मा देखिएको जानकारी दिए । “सबैभन्दा बढी संक्रमित प्रदेश ५ को बाँकेमा देखिएको छ,” उनले भने, “यो प्रदेशमा १४२ जना संक्रमण देखिएको छ ।” उनले प्रदेश २ का सबै जिल्लामा कोरोना संक्रमण देखिएको बताए । अहिलेसम्म ४१ जिल्लामा कोरोना संक्रमण देखिएको छ । उनका अनुसार अहिलेसम्म ५८४ जनामा संक्रमण देखिएको छ । यस्तै कोरोना निको हुनेको संख्या भने ७० पुगेको छ । ५११ जनाको विभिन्न अस्पतालमा उपचार भइरहेको छ । उनका अनुसार उपचाररत सबैको स्वास्थ्य अवस्था भने अहिलेसम्म सामान्य छ । नेपालमा कोरोना भाइरसको संक्रमणबाट तीनजनाको मृत्यु भइसकेको मन्त्रालयले जनाएको छ ।
कोरोना संक्रमण तथ्यांकमा
प्रदेश १ का ७ जिल्लामा कोरोना संक्रमण देखिएको छ । जसमा उदयपुरमा ३३, खोटाङमा १, झापा ३६, धनुकटा ७ भोजपुर १, सुनसरी ३, मोरङमा ५ जना गरी ८६ जनामा संक्रमण देखिएको छ । जसमा २६ जना उपचारपछि घर फर्किइसकेका छन् ।
प्रदेश २ का आठै जिल्लामा कोरोना संक्रमण देखिएको छ । जसमा धनुषा ९, बारा ११, पर्सा ९१, महोत्तरी ३, रौतहट २२, सप्तरी २, सर्लाही ३३, सिराहामा एकजना छन् । यस प्रदेशमा मात्र कोरोना संक्रमण देखिने कुल संख्या १७२ पुगेको छ । जसमा निको हुनेको संख्या ६ जना छन् ।
वाग्मती प्रदेशका १० जिल्लामा कोरोना संक्रमण देखिएको छ । जसमा काठमाडौं ११, काभ्रे एक, चितवन ६, धादिङ ३, भक्तपुर ४, मकवानपुर ३, रामेछाप एक, ललितपुर एक, सिन्धुपाल्चोक एक र सिन्धुली एकजना गरी ३१ जनामा संक्रमण देखिएको छ । यस प्रदेशमा निको हुनेको संख्या नौ छ ।
गण्डकी प्रदेशका तीन जिल्ला पूर्वी नवलपरासी दुईजना, लमजुङ १, बागलुङ २ गरी पाँचजनामा संक्रमण देखिएको छ । जसमा दुईजना निको भएका छन् ।
प्रदेश ५ का ६ जिल्लामा २ सय ७० जनामा कोरोना संक्रमण देखिएको छ । जसमा देखिने जिल्ला कपिलवस्तु ७७, नवलपरासी ६, बर्दिया ३, बाँके १४२, रूपन्देही ३७ दाङ ५, गरी जम्मा २ सय ७० छन् । गुल्मीका एक संक्रमितको भने मृत्यु भएको छ । जसमा निको हुनेको संख्या २२ जना छन् ।
कर्णाली प्रदेशका दुई जिल्ला दैलेख एक, सुर्खेत तीन गरी चार संक्रमित मात्र छन् । उनीहरू चारैजनाको उपचार भइरहेको छ ।
सुदूरपश्चिम प्रदेशका चार जिल्लामा कोरोना संक्रमण देखिएको छ । जसमा कञ्चनपुर १, कैलाली ७, डडेलधुरा १ र बैतडी ५ जना गरी १४ जनामा कोरोना संक्रमण देखिएको छ । जसमध्ये पाँचजना निको भएका छन् ।