विराटनगर । प्रदेश १ को बर्खे अधिवेशनको तयारी तीव्र पारिएको छ । कोरोना जोखिमका कारण प्रदेशसभाको हलमा दूरी कायम गर्दै नयाँ कुर्सी व्यवस्थापन गरिएको छ । 

यसरी व्यवस्थापन गर्दा एउटै हलमा सबै अटाउन मुस्किल भएपछि केही सांसदहरुलाई माथिल्लो तलामा स्क्रिनबाट प्रत्यक्ष प्रसारणमार्फत बैठकको कारबाहीमा सहभागी गराउने सचिवालयले तयारी गरेको छ । 

प्रदेशसभाका सचिव गोपालप्रसाद पराजुलीले तल ६३ वटा कुर्सी प्रदेशका सांसदहरूका लागि व्यवस्थापन गरिएको बताए । भने, ‘‘नअटाउने माननीयहरूलाई स्क्रिनमा बैठक लाइभ देखाउने प्रबन्धसहित माथिल्लो तलामा व्यवस्थापन गरिएको छ ।’’ पत्रकारहरूले पनि मिडिया सेन्टर वा माथिल्लो तलामै राखिने स्क्रिनमा बैठकको कारबाही हेर्न र रिर्पोटिङ गर्न पाउने पराजुलीले बताए ।

प्रदेश १ मा ९३ जना सांसद छन् । बर्खे अधिवेशन यही जेठ १४ गते २ बजेको लागि बोलाइएको छ । अधिवेशनमा प्रदेश सरकारको नीति तथा कार्यक्रम र बजेट पेस हुनेछ । बैठकमा सहभागी हुने सांसद, सचिवालयका कर्मचारी, सुरक्षामा खटिने सुरक्षाकर्मी र रिर्पोटिङमा जाने पत्रकारहरूका आज नै कोरोना परीक्षण गर्न स्वाब संकलनको काम सुरु भएको छ । 

सभामुख प्रदीपकुमार भण्डारीले अहिले परिस्थिति अलि फरक र संकटग्रस्त भएकाले सावधानीका सबै उपाय अनपाइएको बताए ।