खेलकुद गतिविधिको भविष्यबारे यसै भन्न सकिँदैन : सिलवाल

खेलकुद गतिविधिको भविष्यबारे यसै भन्न सकिँदैन : सिलवाल

काठमाडौं । राष्ट्रिय खेलकुद परिषद् (राखेप) का सदस्य–सचिव रमेशकुमार सिलवालले नेपाली खेलकुद गतिविधिको भविष्यबारे अहिलेको अवस्थामा यसै भन्न नसकिने बताएका छन् । अखिल नेपाल फुटबल संघ (एन्फा) को टेक्निकल रिपोर्ट सार्वजनिक कार्यक्रममा उनले हाल नेपाली खेलकुद गतिविधिको भविष्य अन्योल रहेको बताएका हुन् । 

विश्वभर महामारीका रूपमा फैलिएको कोरोना भाइरसका कारण स्थगित भएको नेपाली खेलकुद सुरु गर्न अझै केही समय लाग्ने सिलवालले बताए । “यसअघि नेपालमा कोरोनाको अवस्था सामान्य भएकाले खेलकुद सुरु गर्ने योजना बनाएका थियौ‌ं । तर, फेरि कोरोना भाइरसको संक्रमण बढ्दो छ । त्यसैले खेलकुद गतिविधि सुरु गर्न केही समय पछि धकेलिएका छौं,” सिलवालले भने, “यसअघि हामीले बन्द रंगशालामा भए पनि खेलकुद गतिविधि सुरु गर्ने योजना अघि सारेका थियौं । स्थगित भएको बी डिभिजन लिग मात्रै भए पनि सक्ने प्रयास गरेका थियौं । तर, त्यो सम्भव हुन सकेन ।”

‘सरकारले स्वीकृति दिए प्रतियोगिता गराउँछौं’

अब खेलकुद गतिविधि कहिले सुरु हुन्छ भनेर भविष्यवाणी गर्न नसकिने उनले बताए । “सरकारको नियम पनि पालना गर्नैपर्‍यो,” उनले भने । यसअघि बाह्रखरीसँग कुरा गर्दै सदस्य–सचिव सिलवालले जेठ पहिलो सातादेखि खेलको प्रकार हेरेर खेलकुद गतिविधि सुरु भएको जानकारी दिएका थिए । वैशाख २८ गते पाँच संघका प्रशिक्षकलाई डाकेरै प्रशिक्षण सुरु गर्न आग्रह गरेको जानकारी दिएका थिए । तर, हाल बोली फेर्दै खेलकुद गतिविधि सुरु गर्न सकिने अवस्था नभएको बताए । 

सदस्य–सचिव सिलवालले मोफसलका गोल्डकपहरूलाई पनि व्यवस्थित गर्न आग्रह गरेका छन् । गोल्डकपको ग्रेड छुट्याउँदै प्रतियोगिता सञ्चालन गर्दा खेलाडी र खेलमा योगदान पुग्नेछ । नत्र नामको मात्रै प्रतियोगिता हुने उनले बताए । सिलवालले घरेलु लिगको स्तर बढाउँदै नेपाली खेलाडीलाई अन्तर्राष्ट्रिय लिगहरू खेल्न सक्ने वातावरण सिर्जना गर्नसमेत सुझाव दिए । 
फाइल तस्बिर ।

प्रतिकृया दिनुहोस
ad