कञ्चनपुर । नोभेल कोरोना भाइरसको संक्रमणका कारण जारी लकडाउनले हजारौं मानिसहरु नेपाल-भारत सीमा क्षेत्रमा अलपत्र परेका छन् । भारतमा रेलसेवा सुरु गरेपछि दैनिक सयौं मानिसहरु सीमा क्षेत्रमा जम्मा हुन थालेका छन् ।
उनीहरुलाई भारतबाट नेपाल भित्रिन दिइएको छैन । तर, बिहीबार केही नेपालीहरुलाई स्थानीयको पहलमा नेपाल क्षेत्रमा ल्याएर क्वारेन्टाइनमा राखिएका छन् । उनीहरुका लागि स्थानीयहरुले सहयोग गरिरहेका छन् ।
गौरीफण्टा नाकाबाट नेपाल प्रवेश गरी मोहनास्थित नवदुर्गा माविको चौरमा रात बिताएका आठ सय भन्दा बढीलाई नेपाली कांग्रेस कञ्चनपुरका महासमिति सदस्य तथा कृष्णपुर नगरपालिकाका मेयरका उमेदवार हेमराज ओझाले शुक्रबार बिहान खाजानास्ताको व्यवस्था गरेका छन् ।
उनले बिहीबार कृष्णपुरका केहीलाई उद्धारसमेत गरेका थिए । कोरोना संक्रमण सुरु भएदेखि उनले लगातार विभिन्न क्षेत्रमा सहयोग गर्दै आएका छन् ।