नेपाली कलाकारको मनिषालाई साथ

नेपाली कलाकारको मनिषालाई साथ

काठमाडौं । बलिउड अभिनेत्री मनिषा कोइरालालाई नेपाली कलाकारले साथ दिएका छन् । नेपालले लिपुलेक, लिम्पियाधुरा र कालापानीलाई समेटेर नयाँ नक्सा जारी गरेकोमा समर्थन गर्दै ट्विट गरेपछि भारतीय सञ्चार माध्यमले मनिषा कोइरालाको आलोचना गरेपछि नेपाली कलाकारले उनलाई साथ दिएका हुन् ।

कलाकारहरु रामकृष्ण ढकाल, सत्यराज आचार्य, दीपकराज गिरी, दीपाश्री निरौला, मनोज गजुरेल, करिष्मा मानन्धर लगायतले मनिषालाई साथ दिएका हुन् । 

“मनिषा जी ! मेरो मनकै कुरो बोल्नुभयो । सलाम छ तपाईंलाई । भौतिक शरीर जसको जहाँ भए पनि मन भने नेपालमै हुन्छ भन्ने कुरा मनिषा जीवाट प्रमाणित भएको छ,” गायक रामकृष्ण ढकालले सामाजिक सञ्जाल फेसबुकमा लेखेका छन्, “सत्यमेव जयते । हामी तपाईंको साथमा छौं । सानो होस् ठूलो होस् देश आखिÞर देश नै हुन्छ । जय नेपाल जय वीर गोर्खाली ।”

हास्य कलाकार मनोज गजुरेलले पनि मनिषाको पक्षमा बोलेका छन् । उनले भारतीय सञ्चार माध्यमको प्रवृत्तिको पनि आलोचना गरेका छन् । 

“मनिषा कोइराला मात्र होइन, इन्डियन मिडियाले अब हामी सबैलाई लखेट्नेछन्, जो उनीहरुको स्वार्थ बिरुद्ध सत्य ओकल्छन्,” उनी सामाजिक सञ्जाल फेसबुकमा लेख्छन्, “त्यसैले राष्ट्रिय एजेन्डामा सबै नेपाली एक हुनु जरुरी छ । यो पक्ष–विपक्षको टम एन्ड जेरी खेल्ने बेला होइन । सिमाना संबन्धमा सरकारको धारणा नै नेपाली जनताको धारणा हुनुपर्छ ।”

गायक सत्यराज आचार्यले मनिषाको सहासको कदर गरेका छन् । उनले भारतमा काम गरेको भन्दैमा नाजायज कामको पनि समर्थन गर्न आवश्यक नरहेको बताएका छन् । 

भारतमा मनिषाले आफ्नो मेहनत र प्रतिभाले स्टारडम कमाएको भन्दै उनी आफ्नो फेसबुकमा लेख्छन्, “मनिषा जी जस्ता हजारौं अनि लाखौंले प्रत्येक दिन त्यो माया नगरीमा आफ्नो भाग्य उज्यालो बनाउन आफूलाई आजमाउँछन् र अधिकांश त अन्धकारमै बिलिन हुन्छन् तर मनिषा अन्धकारमै हराउने कालो रङ्गको साटो अन्धकार हटाउने सेतो प्रकाश बनिन् । त्यो पनि उनले आफ्नो कठोर मेहेनत, संघर्ष र भाग्यको कारणले प्राप्त गरेकी हुन् । यदि त्यो स्थान हासिल नगरेकी भए भारतले के फोकटमा उनलाई ख्वाएर राख्थ्यो र ? एक गाँस खाना त के एक थोपा पानीसम्म पनि पाउँदैन थिइन् ।”

“धन्य छ मनिषा तिमीलाई । वास्तवमा वीर गोर्खालीकी छोरी भन्न त तिमीलाई सुहाउँछ । देशको सीमाको लागि यसरी निडर भएर आफ्नो कर्मक्षेत्र बिरुद्ध नै खुलेआम उत्रियौ । जसलाई तिमीले मौनताका साथ समर्थन गरेको भए पनि हुन्थ्यो अनि अहिले जस्तो यसरी आलोचित हुनु पर्दैन थियो । तर तिम्रो स्वाभिमानले त्यसो गर्न दिएन,” सत्यराज अगाडि लेख्छन्, “त्यसैले त तिमी धक फुकाएर बोल्यौ । र यो तिम्रो अदम्य साहसलाई कोटी कोटी प्रणाम गर्दछु ।”

नायिका करिष्मा मानन्धरले पनि मनिषा कोइरालाको समर्थनमा लेखिएको स्टाटस र समाचारहरु सेयर गरिरहेकी छिन् । 

हास्य कलाकार दीपकराज गिरीले पनि आफ्नो फेसबुक स्टाटसमार्फत मनिषालाई समर्थन गरेका छन् । 

निर्देशक तथा कलाकार दीपाश्री निरौलाले पनि मनिषालाई साथ दिएकी छिन् । उनले मनिषको कदमलाई समर्थन गर्दै लेखिएको समाचार फेसबुकमा पोस्ट गर्दै लेखेकी छिन्, “आखिर हाम्रो मन त नेपाली हो सलाम मनिषा दिज्जु ।”

नेपालले भारतले मिचेको भूमीलाई समेटेर नयाँ नक्सा जारी गर्ने निर्णय गरे पछि बलिउड अभिनेत्री मनिषाले ट्विटरमा लेखेकी थिइन् “हाम्रो सानो देशको आत्मसम्मान कायम राख्न सफल भएकोमा धन्यवाद । अब हामी तीन महान देशहरुबीच शान्तिपूर्ण र सम्मानजनक संवादका लागि आशावादी छौं ।”

प्रतिकृया दिनुहोस
ad