काठमाडौं । नागरिक प्रदर्शनका प्रहरी र सीआरपीले अन्धाधुन्द गोली प्रहारका घटना बढ्दै गएपछि नेसनल कन्फ्रेन्स अध्यक्ष तथा कस्मिरका पूर्व मुख्यमन्त्री ओमर अब्दुल्लाले भारत सरकारलाई सोधेका छन् : कस्मिरमा युद्ध घोषणा गरेकै हो ? 

इन्डिया टुडेको अनलाइन संस्करणमा आइतबार जनाइएअनुसार अब्दुल्लाले कस्मिरी जनताविरुद्ध केन्द्र सरकारले युद्ध घोषणा गरेको आरोप लगाए । उनले सरकारलाई पाकिस्तान र कस्मिरका जनतासँग छलफल गरी राजनीतिक समस्या समाधान गर्न दिएको सल्लाह नसुनेको आरोप पनि लगाएका छन् ।

कस्मिरका जनतामाथि भएको सरकारी दमनबाट सयौं युवा अपांग भएका छन् भन्दै अब्दुल्लाले तिनीहरूमाथि अन्धाधुन्द गोली प्रहार गरिएको गुनासो गरेका छन् । कस्मिर उपत्यकामा भएको आन्दोलनका लागि पाकिस्तानलाई दोष दिनु वा कानुन व्यवस्थाको समस्या मान्नु अपराधी मानसिकता हो भन्दै उनले कस्मिरका युवामा चर्को असन्तुष्टि र आक्रोश रहेको पनि बताएका छन् ।

सरकारले सर्वोच्च अदालतलाईसमेत ढाँटेको आरोप पनि पूर्व मुख्यमन्त्री अब्दुल्लाले लगाएका छन् । भारत सरकारले शुकवार सर्वोच्च अदालतलाई कस्मिरको अवस्थामा सुधार भएको प्रतिवेदन दिएको थियो ।

कर्फ्यु खुकुलो भएका बेला एटीएम मेसिनको अवस्था निरीक्षण गर्न गएका २३ वर्षीय सुरक्षा गार्ड रियाजको शरीरमा ३०० वटा गोली भेटिएको पनि टुडेले जनाएको छ । सरकारी शिक्षण अस्तचालमा रियाजको शव परीक्षण गर्दा त्यति धेरै गोली पाइएको थियो । रियाजको परिवारले एटीएम नजिकै तैनाथ सीआरपीका जवानले चलाएको गोली लागेको आरोप लगाएको छ । 

सरकारले संवादको आग्रह नसुनेजस्तै निहत्था नागरिकविरुद्ध घातक हतियार प्रयोग नगर्न दिएको सल्लाह पनि नसुनेको उनले गुनासो गरे ।