विराटनगर । विराटनगरको वडा नम्बर ६ र १५ मा दुई जना व्यक्तिमा कोरोना संक्रमण पुष्टि भएको छ । संघीय सरकारको स्वास्थ्य मन्त्रालयसंगै प्रदेश १ का सामाजिक विकास मन्त्री जीवन घिमिरेले पनि दुई जना संक्रमित विराटनगरका स्थानीय भएको पुष्टि गरेका छन् ।
विराटनगर महानगरपालिकाले बिहीबार दुबै वडाका दुई टोलबाट ४३ जनाको स्वाब संकलन गरी परीक्षणको लागि धरानस्थित वीपी कोइराला स्वास्थ्य विज्ञान प्रतिष्ठानको ल्याबमा पठाएको थियो । महानगरपालिकाका मेयर भीम पराजुलीका अनुसार परीक्षणको रिर्पोट आज साँझ आउँदा दुई जनामा कोरोना पुष्टि भएको हो ।
मेयर पराजुलीले भने,‘‘स्थानीय प्रशासन, महानगर र प्रदेश सरकारसमेतको छलफलपछि संक्रमित भेटिएको टोललाई आज रातिबाटै सिल गर्दैछौं ।’’ संक्रमण पुष्टि भएसंगै विराटनगरमा अब लकडाउन कडा पारिने पराजुलीले जानकारी दिएका छन् ।
दुबै संक्रमितलाई प्रदेश सरकारले विराटनगरमा संचालनमा ल्याएको कोशी कोभिड १९ उपचार केन्द्रमा ल्याउने तयारी थालिएको छ । मेयर पराजुलीका अनुसार संक्रमित एक जना एक साताअघि मात्र भारतबाट विराटनगर आएको खुल्न आएको जानकारी दिएका छन् ।
पराजुलीले भने,‘‘संक्रमण पुष्टि भएपछि हामीले थप कुरा सोधीखोजी गर्दै जाँदा उनी भारतबाट आएको खुल्न आएको छ । कसरी कुन बाटोबाट आए ? को कोसंगको सम्पर्कमा रहे भन्ने खोजी शुरु भईसकेको छ ।’’
संक्रमित एकजना भने स्थानीय नै भएको खुलेको पराजुलीले जानकराी दिए । सम्बन्धित ठाउँ सिल गरेर उच्च सतर्कता अपनाइने तयारी भएको छ ।
यसअघि महानगरको पहलमा उदयपुरको भुल्केमा १२ जना जमातीमा कोरोना पुष्टि भएपछि उनीहरु बसेको रानी मरकजका सदस्यहरुको पनि आरडीटी र स्वाब परीक्षण गरिएको थियो । तर, उनीहरुको रिर्पोट भने नेगेटिभ आएको थियो ।