काठमाडौं । कोभिड–१९ संक्रमणको जोखिम कम गर्न सरकारले जारी गरेको लकडाउनको ४८ दिन पुगेको छ । 

गत चैत ११ बाट जारी गरिएको लकडाउनको ४८औं दिनमा आइपुग्दा अत्यावश्यक सेवाका पसलहरूसँगै केही अन्य पसलहरू पनि खुल्न थालेका छन् । सरकारले पछिल्लो समय औषधि पसल, तरकारी पसल र खाद्यान्न पसलहरू खोल्ने निर्णय गरेपछि केही भिड बढेको हो ।

उपत्यकामा अत्यावश्यक र खाद्यान्न बोकेका सवारीसँगै निजी पासवाहक सवारीसाधन पनि सञ्चालनमा आएका छन् । सडकमा गुडेका सवारीसाधन हेर्दा झन्डै जाम व्यवहोर्नुपर्ने अवस्था छ । 

मुख्य व्यापारिक मल तथा व्यापारिक क्षेत्रहरू अझै बन्द रहे पनि विभिन्न क्षेत्रमा रहेका तरकारी, खाद्यान्न तथा औषधि पसलहरू भने पूर्ण खुलेका छन् । विगतका दिनभन्दा धेरै सवारीसाधन गुडेको देख्दा लकडाउन खुलेकै हो कि भन्ने सर्वसाधारणलाई महसुस भएको छ । 

सरकारले खाद्यान्न, उत्पादन र प्रशोधन, दूध तथा दुग्धजन्य पदार्थ, औषधि पसल, खानेपानी उत्पादन, पाउरोटी, विस्कुट र कन्फेक्सनरी र पशु औषधि र कीटनाशक औषधिलगायत सञ्चालन गर्ने पाउने निर्णय गरेको छ ।

काठमाडौंमा गाडी चलाउने समय तोकियो, पानी र स्वास्थ्यका सवारी दिनभर चल्ने

बालुवा प्रशोधन तथा क्रसर, सिमेन्ट, जस्तापाता, विद्युत् उत्पादन, फोहोरमैला सङ्कलन तथा प्रशोधन, वर्कसप, छानाखाना तथा प्रेससम्बन्धी उद्योगलगायत क्षेत्र सञ्चालन छन् । शैक्षिक संस्था, तालिम तथा प्रशिक्षण केन्द्र, गैरखाद्यवस्तु बिक्री वितरण गर्ने व्यावसायिक मलहरू र होटल तथा रेस्टुरेन्टहरू सञ्चालन गर्न नपाइने निर्णय सरकारले गरेको छ । 

आज उपत्यकामा देखिएका थप तस्बिरहरू :