काठमाडौं । सिंहदरबार गेटमा प्रहरीमाथि हातपात गर्ने ४ जना चिनियाँ नागरिकविरुद्ध अभद्र व्यावहारमा मुद्दा चलाइने भएको छ । स्वदेश फिर्ता जान पाउनुपर्ने माग गर्दै शुक्रबार सिंहदरबार गेटमा प्रदर्शनमा उत्रिएका चिनियाँले प्रहरीमाथि नै हातपात गरेका थिए ।
सो क्रममा प्रहरीका डीएसपी र एकजना प्रहरी जवान घाइते भएका थिए । प्रहरीले ४७ जना चिनियाँलाई नियन्त्रणमा लिएपनि ४ जनाविरुद्ध मुद्दा चलाउन लागेको हो । महानगरीय प्रहरी परिसर काठमाडौंका अनुसार हातपातमा ४ जनाको संलग्नता देखिएको थियो ।
उनीहरुमध्ये २ जनालाई महानगरीय प्रहरी वृत सिंहदरबार र २ जनालाई वृत दरबारमार्गमा राखिएको थियो । उनीहरुलाई म्याद थपका लागि जिल्ला प्रशासन कार्यालय लैजाने तयारी भएको प्रहरीले जनाएको छ ।