काठमाडौं । काठमाडौं उपत्यकाको जनजीवन सामान्य बन्दै गएको छ । सरकारी कार्यालय, बैंक तथा वित्तीय संस्था र विभिन्न उद्योग खुलेपछि जनजीवन केही सहज बनेको हो ।

विगतको तुलनामा आइतबारदेखि प्रहरी पनि केही लचिलो देखिएको छ । यसअघि प्रहरीले लकडाउनमा कडाइ गर्दै आएको थियो । यस्तै काठमाडौंका भित्री क्षेत्रमा खाद्यान्न, इलेक्ट्रिक पसल, तरकारी पसल, पुस्तक पसलसमेत खुलेका छन् ।

यातायतका साधनसमेत विगतको तुलनामा बढी गुडेका छन् । महानगरीय प्रहरी कार्यालय रानीपोखरीका डीआईजी विश्वराज पोखरेलले सरकारले खुला गरेको क्षेत्रमा जानेहरूलाई नरोकिएको तर अनावश्यक रूपमा निस्किएकाहरूलाई आएकै स्थानतर्फ फिर्ता पठाइने बताए । पोखरेलले भने, “भिड नगर्न आग्रह गरिरहेका छौं । कामका लागि निस्किएकालाई अवरोध गरेका छैनौं । नियमित जाँच र सोधपुछ भने गर्छौं ।”

काठमाडौं उपत्यका भित्रिने नाकामा समेत कडाइ गरिएको डीआईजी पोखरेलले बताए । उनले भने, “विगतको तुलनामा आजबाट सवारीसाधन र मानिसको चाप सडकमा बढी देखिन्छ । तर लकडाउन हटेको होइन । सामाजिक दूरी र स्वास्थ्यमा ध्यान दिएर सबैले सरकारले तोकेको काम गर्न सक्छन् । तर अनावश्यक भिड गरे नियन्त्रणमा लिन्छौैं ।”

यस्तै आज पहिलोपटक काठमाडौंमा एकजना पनि ‘होल्ड’मा परेका छैनन् । यसअघि लकडाउन तोडेको आरोपमा प्रहरीले दैनिक १५ सय बढीलाई कारबाही स्वरूप होल्ड गर्दै आएको थियो । डीआईजी पोखरेलले कामको उचित प्रयोजन भए प्रहरीले कसैलाई होल्ड नगर्ने स्पष्ट पारे । 

पोखरेलका अनुसार पाँच जनाबढी जमा भएमा भने प्रहरीले नियन्त्रणमा लिनेछ । उनले भने, “कोरोनाको जोखिम कम भइसकेको छैन । हामी सचेत हुन जरुरी छ । यस्तोमा अनाश्यक भिड गर्न खोजे नियन्त्रणमा लिएर कारबाही गर्छौं ।”