प्युठान । प्युठान नगरपालिका ४ बिजुवार गणतान्त्रिक खेलमैदानमा गए राति हावाहुरीसहित परेको पानीले निर्माण गरिएको क्वारेन्टाइन उडाएको छ ।

रातको करिब २ बजे पानीसहितको हावाहुरीले क्वारेन्टाइन उडाएको थियो । प्युठान २, सिद्धार्थ सामुदायिक संस्थाको क्वारेन्टाइनमा १५ दिनदेखि बस्दै आएका आएका पाँचजनाको आरडीटी गर्दा दुईजनाको पोजेटिभ रिपोर्ट आएपछि तिनलाई गणतान्त्रिक खेलमैदानको क्वारेन्टाइनमा राखिएको नगरपालिका स्वास्थ्य शाखा प्रमुख गोविन्द घिमिरेले बताए । 
उनीहरुलाई तत्काल सुरक्षित ठाउँको व्यवस्थापन गरिने जनाइएको छ । हावाले क्वारेन्टाइनका केही संरचना उडाएको जिल्ला प्रहरी कार्यालयका प्रमुख प्रहरी नायब उपरीक्षक नरेन्द्रकुमार कार्कीले बताए । 

जोखिममा रहेकाको पीसीआर परीक्षण
जिल्लामा जोखिममा रहेकाहरुको पीसीआर परीक्षणका लागि स्वाब पठाइएको छ । प्युठान नगरपालिकाबाट ११ र गौमुखी गाउँपालिकाबाट २८ गरी ३९ जनाको शनिबार स्वाब संकलन गरी आज (आइतबार) प्रदेश जनस्वास्थ्य प्रयोगशाखा भैरहवा पठाइएको जिल्ला स्वास्थ्य कार्यालयले जनाएको छ । शनिबार प्युठान २, दाखाक्वाडीका दुई व्यक्तिमा आरडीटी नतिजा पोजेटिभ देखिएपछि स्वाब संकलन गरी परीक्षणका लागि पठाइएको जिल्ला स्वास्थ्य कार्यालयका प्रमुख विशाल सुवेदीले जानकारी दिए ।
 
उनका अनुसार बहराइनबाट आएका एक, कतारबाट आएका चार र भारतबाट आएका तथा उच्च जोखिममा रहेका २३ सहित गौमुखी गाउँपालिकाबाट २८ र प्युठान नगरपालिकाका ११ जनाको पीसीआर परीक्षणका लागि स्वाब संकलन गरी पठाइएको प्रमुख सुवेदीले जानकारी दिए । जिल्लाभर क्वारेन्टाइनमा रहेका र अन्य जोखिमपूर्ण ठाउँबाट आएका भए स्वाब परीक्षण गराइने सुवेदीको भनाइ छ । -रासस