रुकुम (पूर्व) ।  रुकुम (पूर्व) को सिस्ने गाउँपालिका – २ को नेटामा शहीद उद्यान निर्माण शुरु गरिएको छ । शहीदका सम्झनामा सांसद विकास कोषको रु ५० लाख बजेटबाट उक्त कामको थालनी गरिएको हो । 

जनयुद्धका बेलामा शहादत प्राप्त गर्नेको सम्झना, सम्मान, मौलिक कला र इतिहासको संरक्षणका साथै व्यावसायिक पर्यटन क्षेत्रको विकासका लागि शुक्रबारदेखि उद्यान निर्माण गर्न थालिएको वडाध्यक्ष जीवन केसीले बताए । उद्यानमा वडाका १४ शहीदको शालिक निर्माण गरिने छ । वडाध्यक्ष केसीका अनुसार उद्यान निर्माणका लागि रु नौ लाख बराबरको विस्तृत परियोजना प्रतिवेदन तयार पारिएको छ । 

उद्यान निर्माणको काम नसकिएसम्म संसद् विकास कोषबाट क्रमागत रुपमा बजेट आइरहने जनाइएको छ । गत वर्ष सोही ठाउँ नजीकै रु २२ लाखमा गाउँपालिकाको भवन निर्माण गरिएको थियो । 

सो वडा जनयुद्धको समयमा कम्युन बसेको ठाउँ हो । त्यस ठाउँमा अझै पनि कम्युन बसेको घरको भग्नावशेष देख्न सकिन्छ । जनयुद्धका समयमा निर्मित विद्युत् आयोजना पनि अहिलेसम्म सञ्चालनमा छ । उक्त आयोजनाले वडा नम्बर २ को छिपखोला बस्तीलाई उज्यालो बनाएको छ । रासस