काठमाडौं । सांसद सुरेन्द्र यादवको अपहरण प्रकरणबारे अनुसन्धान गर्न काठमाडौंबाट प्रहरीको टोली महोत्तरी प्रस्थान गरेको छ । प्रहरी अधिकृत सहितको टोली महोत्तरी प्रस्थान गरेको हो ।

आजमात्रै जिल्ला सरकारी वकिलको कार्यालयले प्रहरीलाई नेकपाका सासंदद्वय महेश बस्‍नेत, कृष्णकुमार श्रेष्ठ र पूर्व आइजीपी सर्वेन्द्र खनालविरुद्धको अपहरण तथा शरीर बन्धकसम्बन्धी कसुरमा अनुसन्धान सुरु गर्न दर्ता गरेको जाहेरी पठाएको थियो ।

सरकारी वकिलको कार्यालयले महानगरीय प्रहरी परिसर काठमाडौंलाई सांसद सुरेन्द्र यादवले दिएको अपहरणसम्बन्धीको जाहेरी दर्खास्त पठाएपछि प्रहरीले अनुसन्धान सुरु गरेको हो । एक उच्च प्रहरी अधिकारीले भने, “महोत्तरीबाटै घटना सुरु भएको दाबी गरिएकाले त्यहाँको वस्तुस्थितिको अध्ययन गर्नुपर्ने देखियो । त्यसैले अनुसन्धान टोली पठाएका हौं । महोत्तरीबाट अनुसन्धान टोली फर्किएपछि थप कुरा खुल्न सक्छ ।”

लकडाउनको समयमा सांसद बस्‍नेत र श्रेष्ठ तथा पूर्वआईजीपी खनाल महोत्तरी पुगेर सांसद यादवलाई काठमाडौं ल्याएको आरोप छ । यादवले आफूलाई इच्छाविपरीत काठमाडौं ल्याइएको बताउँदै आएका छन् ।