काठमाडौं । कोरोना भाइरस रोकथाम तथा नियन्त्रणका लागि सरकारले लागू गरेको लकडाउनको आज ४६ दिन पुगेको छ । 

सरकारले गत चैत ११ देखि लागू गरेको लकडाउनको ४६औं दिनसम्म आइपुग्दा जनजीवन प्रभावित बनेको छ । कोरोना भाइरसको संक्रमण फैलन नदिन सरकारले लकडाउनलाई निरन्तरता दिँदै आएको छ । यसैक्रममा सरकारले जेठ ५ गतेसम्मका लागि लकडाउन गर्ने निर्णयसमेत गरेको छ । 

लामो समयदेखिको लकडाउनका कारण जनजीवन प्रभावित भए पनि मानिसहरूले लकडाउनलाई पालना गरेका छन् । सडकमा केही अत्यावश्यक सेवा तथा कर्मचारीका सवारीसाधनहरू सञ्चालनमा आएका छन् । 

प्रहरीले लकडाउन पालना गराउन सवारीसाधनको जाँचलाई कडा बनाएको छ । काठमाडौं उपत्यकाका विभिन्न स्थानमा शुक्रबार पनि प्रहरीले सवारी जाँचलाई कडा पारेको छ । प्रहरीले पासबिना सञ्चालनमा आएका सवारीसाधन नियन्त्रणमा लिई कारबाही गरेको छ । सहरका भित्री सडकमा भने केही तरकारी एवं खाद्य पसलहरू खुलेका छन् । मानिसहरू आफ्नो घरनजिक रहेको पसलसम्म पुगेर दैनिक उपभोग गर्ने सामग्रीहरू किनमेल गरेको देख्न सकिन्छ ।