काठमाडौं । कोरोना भाइरस संक्रमण हुने भन्दै सरकारले घोषणा गरेको लकडाउन आज ४५ दिन पुगेको छ ।
यस्तो बेलामा दैनिक मजदुरी गर्ने परिवार समस्यामा परेका छन् । उनीहरूलाई लक्षित गर्दै विभिन्न सरकारी तथा गैरसरकारी संस्थाहरू खाना खुवाउन जुटेका छन् । यसैक्रममा काठमाडौंको टोखा नगरपालिका ३ का युवाले पनि विपन्नलाई विगत २३ दिनदेखि निःशुल्क भोजन गराउँदै आएका छन् ।
बानियाँटार युवा समाज र जनकल्याण सामाजिक केन्द्रले बिहान–बेलुका टोखा हाउजिङ पुलनजिकै मेस चलाउँदै आएको स्वयंसेवी युवा सविन प्रधानले बाह्रखरीलाई जानकारी दिए ।
“दैनिक ६ सयभन्दा धेरैलाई खाना खुवाउँछौं । बिहान ९ र साँझ ५ बजे मेस सञ्चालन हुन्छ,” समाजका अध्यक्ष प्रवीण बानियाँले भने, “यहाँ आउने सबैलाई सहजै खाना दिन्छौं भने अशक्तलाई घरमै पुर्याइदिन्छौं ।”