काठमाडौं । रेणु यादवको समूह समाजवादी पार्टीबाट अलग भएर नयाँ पार्टी गठनको तयारी गरेको छ । 

अध्यादेशले पार्टी फुटाउने बाटो खोलिदिएपछि रेणु यादव, मोहम्मद ईस्तियाक राइ, विमल श्रीवास्तव, प्रदीप यादव, उमाशंकर अरगरिया, कलुदेवी विश्वकर्मा, रेणु गुरुङ, सुरेन्द्र यादवले पार्टीले नयाँ दल गठनको तयारी गरेका थिए । बुधबारै साँझ घोषणाको तयारी रहेको स्रोत बताउँछ ।

पार्टी विभाजनको सूचना संसद् सचिवालयमा पुगिसकेको स्रोतको दाबी छ । पार्टी विभाजन हुने निश्चित भएपछि र अध्यादेशले गाँठो फुकाइदिएपछि उपेन्द्र यादवले रातारात राष्ट्रिय जनता पार्टी (राजपा) राजपाका शीर्ष नेतासँग संवाद गरेर एकता गर्ने सहमति गरेको स्रोत बताउँछ ।

समाजवादी र राजपाले पार्टी एकता गर्ने सहमति गरेपछि रेणु यादवको समूहले बिहीबार बिहान नयाँ दल गठनको घोषणा गर्ने तयारी गरेको एक नेता बताउँछन् । 

समाजवादी पार्टी र राजपा एकीकृत हुने सहमति गरे पनि निर्वाचन आयोगबाट मान्यता पाइसकेको छैन । बिहीबार कार्यलय खुल्नेबित्तिकै निवेदन दिएपछि मात्रै एकतासम्बन्धी मान्यता पाउने प्रक्रिया सुरु हुनेछ ।

“राजपा, समाजवादी एक हुने भने पनि निर्वाचन आयोगले दर्ता नहुँदासम्म अलगअलग पार्टीका रूपमा चिन्छ । बिहीबार बिहान समाजवादीबाट अलग हुने समूहले पहिला दर्ता गर्‍यो भने विभाजनको मान्यता पाउँछ,” एक नेता भन्छन् ।

रेणु यादवको समूहलाई विभाजनको मान्यता नदिन रातारात पार्टी एकता गरिए पनि फैसला भने निर्वाचन आयोगमा दर्ता गर्न को पहिले पुग्छ भन्ने ले नै तय गर्ने स्रोतको दाबी छ ।

रेणु यादव र केपी ओली नेतृत्वकै सरकारबाट बहिर्गमित भएका मोहम्मद ईस्तियाक राइन सरकारसँग निरन्तर संवादमा थिए । दुई–चार महिनाअगाडि नै पार्टी फुटाउन खोजेको भए पनि रेणुको समूहले केन्द्रीय कमिटी र संसदीय दल दुवैतिर ४० प्रतिशत जुटाउने सम्भावना थिएन ।

प्रधानमन्त्री ओलीले अध्यादेशमार्फत् एकतिर मात्रै ४० प्रतिशत पुर्‍याए पुग्ने गरेर बाटो खोलिदिएका थिए । ओलीले समाजवादीका असन्तुष्टहरूसँग संवाद बढाएको कुरा पार्टीलाई जानकारी दिएका थिएनन् । सचिवालयका कुनै पनि नेतालाई यसबारे जानकारी छैन । सुइँको दिए सूचना पुग्ने भयले त्यसो गरेको हुनसक्ने नेकपाकै नेता बताउँछन् ।

स्रोतका अनुसार रेणु नेतृत्वको दलले अलग पार्टीको मान्यता पाए उपसभामुख बनाउने आश्वासन दिइएको छ । रेणुले सुरुमा ७ जनामात्रै जुटाउन सकेको र एकजना नपुग्ने भएपछि मन्त्रीको प्रलोभन देखाएर सुरेन्द्र यादवलाई काठमाडौं झिकाइएको स्रोतको भनाइ छ ।

सुरेन्द्रलाई एकाएक काठमाडौं झिकाएपछि समाजवादीमा हलचल मच्चिएको थियो । समाजवादीले सरकारले काठमाडौं ल्याएको जानकारी दिएको थियो ।

उनी प्रहरीसँग सहयोग मागेर काठमाडौं आएको स्रोतको भनाइ छ ।

प्रदीप यादव भन्छन्– पार्टी विभाजन गर्ने हल्ला मात्रै हो, एकीकृत पार्टीमै विश्वास छ 

बिहीबार मध्यराति बाह्रखरीसँग कुरा गर्दै पार्टी फुटाउने, अलग दल खोल्ने कुनै योजना नरहेको र त्यस्तो छलफल पनि नभएको बताए ।

“त्यस्तो केही छैन । अलग दल गठन गर्ने कुरै छैन । पार्टीभित्र सन्तुष्टि, असन्तुष्टि होला । त्यो स्वाभाविक कुरा होला । साथीहरू असन्तुष्ट नभएका होइनन् । तर, पार्टी नै फुटाउने, दल नै अलग गर्ने कुरा छैन,” उनले आश्वस्त पार्ने कोसिस गरे ।

उनले समाजवादी र राजपा एक भएर नयाँ पार्टी बनेको त्यसप्रति नै भरोसा रहेको प्रदीपले दाबी गरे ।

“कोरोना सन्त्राशकै बीच समाजवादी र राजपा एकता गरेर नयाँ पार्टी गठन भएको छ, जनता समाजवादी पार्टी । हामीलाई त्यही पार्टीप्रति नै विश्वास छ । भरोसा छ । आशा छ, यो पार्टी लोकतान्त्रिक पद्धतिबाट सबैलाई लिएर समावेशी हिसाबले अघि बढ्छ भन्ने विश्वास हामीले लिएका छौं । हाम्रो आस्था यही पार्टीमा छ । अलग पार्टी खोल्ने, दर्ता गर्ने हाम्रो कुनै मनशाय छैन ।

उनले समाजवादी समूहसँग असन्तुष्ट रहेकाहरूले कसैले पनि नयाँ दल खोल्ने तयारी गरेको थाहा नभएको बताए ।