काठमाडौं । नेकपाका वरिष्ठ नेता झलनाथ खनालले पार्टीमा अराजकतावादी, नोकरशाही प्रवृत्ति बढे उपलब्धि गुम्ने खतरा औंल्याएका छन् ।

सरकारले दुई अध्यादेश जारी गरेपछि पार्टीभित्र विवाद उत्पन्न भइरहेका बेला खनालले पार्टी विधि, नीति र पद्धतिसंगत ढङ्गले चलाउन माग गरेका हुन् ।

नेकपा स्थापना दिवसका सन्दर्भमा शुभकामना सन्देश जारी गर्दै नेता खनालले भनेका छन् । “नेकपालाई वैचारिक, राजनीतिक, सैद्धान्तिक र सङ्गठनात्मक रूपले सुदृढ र एकताबद्ध गरेर तथा पार्टीलाई नीति, विधि र पद्धतिसंगत ढङ्गले अघि बढाएर मात्र उपलब्धीहरूको रक्षा गर्न सकिन्छ । तर पार्टीमा अराजकतावादी र नोकरशाही प्रवृत्ति बढ्न थाले भने प्राप्त उपलब्धीहरू नै गुम्ने खतरा हुन्छ ।”

उनले अहिले सबैप्रकारका अस्थिरतावादी प्रवृत्तिकाविरूद्ध एकता भएर कोराना सङ्क्रमण रोकथाम गर्नुपर्ने औंल्याएका छन् ।

२००६ साल वैशाख १० गते नेकपा स्थापना भएको थियो । १० वैशाखलाई नेकपाले स्थापना दिवस मान्दै विविध कार्यक्रम गर्दै आएको छ । यसपटक लकडाउनका कारण सबै शीर्ष नेताले विज्ञप्तिमार्फत् शुभकामना सन्देश दिएका छन् । पार्टीको भावनात्मक एकताको खाँचो औंल्याएका छन् ।