काठमाडौं । पूर्वमाओवादी निकट मन्त्रीहरु प्रचण्ड निवास खुमलटार पुगेका छन् । मन्त्रिपरिषद बैठकले पार्टी विभाजनका लागि सहज हुने व्यवस्था गरेसँगै पूर्वमाओवादी मन्त्रीहरु प्रचण्ड निवास पुगेका हुन् ।
मन्त्रिपरिषदको बैठक सकिनासाथ उर्जा मन्त्रायलमा पूर्वमाओवादी मन्त्रीहरुको भेला भएको थियो । त्यसलगत्तै उनीहरु दाहाल निवास पुगेका हुन् ।
प्रधानमन्त्री निवास बालुवाटारमा बसेको बैठकमा पार्टी विभाजनका लागि यसअघि कायम भएको व्यवस्थामा परिवर्तन गर्नेगरी अध्यादेश ल्याउने निर्णय भएको थियो ।
आजै राष्ट्रपतिकहाँ उक्त अध्यादेश लैजाने र जारी गर्ने तयारी छ ।
यसअघि दल विभाजनसम्बन्धी व्यवस्थामा केन्द्रीय समिति र संसदीय दलमा ४० प्रतिशत अनिवार्य थियो भने अब केन्द्रीय समिति वा संसदीय दल कुनै एकमा मात्रै ४० प्रतिशत भए पनि पुग्ने व्यवस्था गर्न लागिएको हो ।
मन्त्रिपरिषद् बैठकमा प्रधानमन्त्री केपी शर्मा ओलीले यो प्रस्ताव ल्याएका थिए । उनको प्रस्तावमा प्रदीप ज्ञवाली, घनश्याम भुसाल र वर्षमान पुनबाहेकका मन्त्रीले मौन समर्थन जनाएका थिए ।