काठमाडौं । नोभेल कोरोना भाइरसलाई जितेका कैलालीका २१ वर्षीय युवकलाई प्रधानमन्त्री केपी शर्मा ओलीले बधाइ दिएका छन् ।
चैत १२ गते कोरोना संक्रमण पुष्टि भएका कैलालीको लम्कीका ती युवकको उपचारपछि शनिबार र आइतबार गरिएको कोरोना परीक्षणका क्रममा नतिजा नेगेटिभ आएपछि उनी आज डिस्चार्ज भएका हुन् ।
उनलाई बधाई दिँदै प्रधानमन्त्री ओलीले सामाजिक सञ्जाल ट्विटरमा लेखेका छन्, "कोरोना भाइरसलाई जितेर कैलालीका २१ वर्षीय युवक आज अस्पतालबाट डिस्चार्ज हुनुभएकोमा बधाई सहित सुस्वास्थ्यको कामना गर्दछु ।"
त्यसैगरी प्रधानमन्त्री ओलीले चिकित्सक, स्वास्थ्यकर्मी तथा उपचार प्रक्रियामा संलग्न संबद्ध सबैलाई धन्यवादसमेत व्यक्त गरेका छन् । नेपालमा कुल कोरोना संक्रमित ३१ भए पनि हालसम्म चारजनाको उपचारपछि निको भएका छन् ।