अपेक्षाकृत ढिलो र आवश्यकता भन्दा धेरै कम संख्यामा भए पनि कोभिड- १९ को परीक्षणको गति केही बढेको छ । यसअघि दिनको एक डेड सय जानको परीक्षण गर्ने गरिएकोमा २४ घन्टामा करिब नौ सय जनाको नमुना परीक्षण गरिएको आधिकारिक जानकारी दिइएको छ । पर्सामा थप तीन जना कोरोनाभाइरस संक्रमित भेटिएको समाचारले तर्साएको छ भने परीक्षणको गति र संख्यामा भएको सुधारले आशावादी बनाएको छ । औषधि पत्ता नलाग्दासम्मका लागि कोरोनाभाइरसको संक्रमण फैलन नदिने उपाय बन्दाबन्दीमा रहनुमात्रै भएको छ । अर्कातिर लामो समयको बन्दाबन्दीले जनतामा असुविधा र छटपटी बढाउन थालेको छ । यस्तो स्थितिमा जनतालाई केही थप समय असुविधा सहन तयार पार्नुको विकल्प देखिँदैन । जनताको पूर्ण साथ र सहयोग पाउन सरकारले गरेको काम जनताकै हितका लागि हो भन्ने विश्वास जनतामा जगाउनु जरुरी हुन्छ ।    

सरकारले अहिले कोरोनाभाइरसको परीक्षणका लागि विवादास्पद ‘र्‍यापिड टेस्टिङ किट’ प्रयोग गरेको समाचारले जनमानसमा अन्योल उत्पन्न गरेको छ । सरकारी अधिकारीहरूले नै चिकित्सा सामग्रीको विवादास्पद ठेक्का रद्द गर्दा ‘र्‍यापिड टेस्ट किट’ नेपालमै छानबिन गरेरमात्र प्रयोग गरिने बताएका थिए । त्यसको छानबिन भए नभएको र भएको भए कस्तो निष्कर्ष निस्कयो भन्ने जानकारी सार्वजनिक गरिएको छैन । तर, त्यही विवादास्पद ठेक्काअन्तर्गत ल्याइएको किट प्रयोग गरेर अहिले परीक्षण सुरु गरिएको छ । त्यसबाट गरिएको परीक्षण पूर्ण विश्वसनीय नहुने चर्चा अन्तर्राष्ट्रिय स्तरमै व्याप्त भएको छ । नेपालमा गरिएको परीक्षणको गलत नतिजा निस्क्यो भने त्यसको परिणाम भयावह हुनसक्छ । सरकार निकट व्यापारी समूहको स्वार्थ रक्षाका लागि त्यस्तो भरपर्न नसकिने किट प्रयोग गरिएको हो भन्ने छाप जनमानसमा पर्न गयो भने त्यो कोरोनाको संक्रमण फैलिएजत्तिकै दुर्भाग्यपूर्ण हुनेछ ।      

नेपाल सरकारले आफ्नै उटपट्याङ हर्कतले विश्वसनीयता गुमाएको हो । यसैले सरकारका सबै क्रियाकलापप्रति जनमानसमा सन्देह व्याप्त छ । यस्तो सन्देह रहुन्जेल सरकारले जनताको सहयोग र साथ पाउन सक्तैन । यसैले अहिले सरकारले कोरोनाभाइरस रोकथाम र उपचारको प्रबन्ध मिलाउन दिए जत्तिकै प्राथमिकता जनमानसमा सरकारप्रति व्याप्त सन्देह मेटाउन पनि दिनुपर्ने देखिएको छ । विवादास्पद किटको प्रयोग गरिएको हो कि होइन र त्यसको नतिजा कति भरपर्दो हुन्छ भन्ने विषयमा सरकारले स्पष्ट शब्दमा सार्वजनिक जानकारी दिनु आवश्यक देखिन्छ । सरकारले ठेक्का रद्द गर्दा प्रयोग गरेको वाक्यले नै ‘¥यापिड टेस्ट किट’प्रति जनमानसमा अविश्वास उत्पन्न भएको हो । यसैले सरकारले नै जनतालाई आश्वस्त बनाउनुपर्छ । शासकहरूका निकट कृपापात्र व्यापारीको स्वार्थका लागि सरकारले जनताको जीवनसँग खेलबाड गर्दैछ भन्ने भ्रम निवारण गर्न सरकारको ध्यान जाओस् ।