काठमाडौं । पूर्वप्रधानमन्त्री डा. बाबुराम भट्टराईले चलचित्र ‘बुलबुल’ आफूलाई मन परेको बताएका छन् । निर्देशक बिनोद पौडेललाई टेलिफोन गरेर डा. भट्टराईले चलचित्र बुलबुलले मन छोएको बताएका छन् ।
“चलचित्रको नाम सुन्दै मलाई हेर्न मन लागेको थियो । तर रिलिज हुँदा हामी श्रीमान् श्रीमती दुबै बाहिर थियौं, त्यसैले हेर्न पाएका थिएनौं,” बिनोदले डा. भट्टराईलाई उद्रित गर्दै भने, “पछि ओस्कारमा गएको थाहा पाएपछि झन हेर्न मन लागेको थियो । आज चलचित्र हेर्दा जानै पर्ने चलचित्र ओस्कारमा गएको रहेछ भन्ने लाग्यो । नेपालको प्रतिनिधित्व गर्ने खालको चलचित्र बनाउनु भएको रहेछ ।”
डा. पत्नी हिसिला यमीले चलचित्रको अन्तिम ओपन इन्डेड सिन आफूलाई पावरफुल लागेको भन्दै छोरी र आमाको मनोविज्ञानको गहन चित्रण गरेको भन्दै निर्देशकको प्रशंशा गरेको बिनोदले सुुनाए । आम नेपाली महिलाको विषयलाई सुन्दर चित्रण गरेको भन्दै उनले नेपाली चलचित्र पनि राम्रो बन्न थालेको भन्दै खुसी व्यक्त गरेकी थिइन् । बिनोदले सबैभन्दा धेरै गाली खाएको अन्तिम सिनको नै हिसिलाले प्रशंसा गर्दा आफ्नो कामको उचित मुल्यांकन भएको अनुभूत गरेको उनले बताए ।
सपरिवार बसेर चलचित्र हेरिसकेपछि छोरी मानुसीले बुवाआमा तपाईंको चलचित्र बुलबुलबारे कुरा गर्ने रे भन्दै बिनोदलाई टेलिफोन गरेकी थिइन् ।
बिनोद पौडेलले निर्देशन गरेको चलचित्रमा स्वस्तिमा खड्का र मुकुन भुषाल मुख्य भूमिकामा छन् । बैशालु उमेरमै श्रीमान् विदेश गएपछि काठमाडौंमा परिवार सम्हालेर बसेकी श्रीमतीको यौन मनोविज्ञान र पारिवारिक जिम्मेवारी चलचित्र ‘बुलबुल’ को मुख्य कथानक हो ।
‘बुलबुल’ अहिले डिजिटल प्ल्याटफर्म फेपीमा ५० रुपैयाँ तिरेर हेर्न सकिन्छ ।