काठमाडौं । सरकारले अलपत्र नागरिकलाई आफैंले व्यवस्थापन गरेर निश्चित गन्तव्यसम्म पुर्‍याउने भएको छ । कोरोना सङ्क्रमण रोकथाम तथा नियन्त्रण उच्चस्तरीय समन्वय समितिले त्यस्तो निर्णय गरेको हो ।

परराष्ट्रमन्त्री प्रदीप ज्ञवालीले रोजगारी बन्द भएर अलपत्र परेका श्रमिक, उपचार गर्न आएका बिरामी, उनीहरूका आफन्तलाई शुक्रबार र शनिबार उपत्यका बाहिर, उनीहरूको गन्तव्यस्थानसम्म पुर्‍याउने तयारी गरेको जानकारी दिए ।

“उपचार गर्न आएका थिए बिरामी, उनीहरूको आफन्त, जसको रोजगारी गुम्यो, बन्द भयो त्यस्ता श्रमिकहरूलाई निश्चित गन्तव्यसम्म लगेर छाडिदिनेगरी निर्णय गरिएको हो,” ज्ञवालीले बाह्रखरीसँग भने ।

सरकारी योजनामा स्र्कटिङ सहित पठाउने ज्ञवालीले जानकारी दिए ।

सरकारले निश्चित ठाउँसम्म पुर्‍याउने र त्यहाँबाट सम्बन्धित जिल्लाले अर्को जिल्लासम्म गर्दै गन्तव्यमा पुर्‍याउने योजना रहेको उनले बताए । गृहमन्त्रालयले स्थानीय तहसँग समन्वय गरेर आवश्यक योजना बनाइरहेको ज्ञवालीको भनाइ छ ।

सामाजिक, भौतिक दूरी, किटाणुशोधनलगायत आवश्यक सबै प्रक्रिया पूरा गरेर अलपत्रको उद्धार गरिने ज्ञवालीले जानकारी दिए ।