काठमाडौं । विश्वभर महामारीका रूपमा फैलिएको कोरोना भाइसर नियन्त्रणका लागि सरकारले खेलाडीलाई पनि परिचालन गर्ने भएको छ ।
युवा तथा खेलकुदमन्त्री जगतबहादुर विश्वकर्माको अध्यक्षतामा बुधबार बसेको बैठकले स्वयंसेवकका रूपमा खेलाडीहरूलाई पनि परिचालित हुन आग्रह गरेको छ । विपतका बेला सबैको सहयोगको खाँचो रहेकाले सबै खेलाडीहरू परिचालित हुन आग्रह गरिएको हो ।
खेलकुद मन्त्रालयले खेलाडीहरू परिचालनको जिम्मेवारी राष्ट्रिय खेलकुद परिष्द (राखेप) लाई दिएको छ । अब राखेपले सबै स्थानीय तहमा रहेका खेलाडीहरूलाई आफ्नो मातहतमा रहेका स्थानीय तहमा परिचालित हुन आग्रह गरेको हो ।
राखेपका सदस्य–सचिव रमेशकुमार सिलवालले आफूहरूले सबै स्थानीय तहमा रहेका खेलाडीहरूलाई पहिले नै परिचालित हुन आग्रह गरिसकेको हुनाले मन्त्रालयको निर्णलाई कदर गर्दै सबै खेलाडीहरूलाई पुनः आग्रह गर्ने बताए ।
“संकटका समयमा हामीले खेलाडीहरूलाई यसअघि पनि परिचालित हुन आग्रह गरिसकेका छौं । अहिले कोरोना भाइरसको संक्रमणको दोस्रो स्टेपमा छौं । पुनः स्थानीय तहमा रहेका खेलाडीहरूलाई आफ्नो मातहतमा रहेका स्थानको समस्या समधान गर्न स्वयंसेवकको भूमिका निर्वाह गर्न आग्रह पनि गरेका छौं,” सदस्यसचिव सिलवालले बाह्रखरीसँगको कुराकानीमा भने ।
यद्यपि राखेपले एकैपटक सबै खेलाडीलाई परिचालन भने गर्ने छैन । स्वयंसेवकका रूपमा अहिले मातहतका खेलाडीहरूलाई पहिलो चरणमा परिचालन गरिनेछ । आवश्यकताअनुसार र स्वयंसेवकको भूमिकामा आउन चाहाने खेलाडीलाई स्थानीय तहबाटै प्रथामिकता दिँदै परिचालन गरिनेछ ।
काठमाडौंको ठूलो क्षेत्रमा भने खेलाडीहरू धेरै परिचालन गर्नुपर्ने अवस्था छ । यो अवस्थालाई मध्यनजर गर्दै लकडाउनमा निश्चित खेलाडीहरू मात्र परिचालन गर्ने राखेपको योजना छ । खेलाडीहरूलाई राखेपले पहिलो चरणमा लागत संकलन गर्नेछ । कुन स्थानीय तहमा कति खेलाडी छन् भन्ने तथ्य संकलन गरेर आवश्यकताअनुसार खेलाडी परिचालन गर्ने राखेप सदस्य–सचिव सिलवालले बताए ।