काठमाडौं । लकडाउनको अवधिमा रंगमञ्चका दर्शकले नाटकबाट टाढा रहन नपरोस् भन्ने उद्देश्यले सुरु भएको ‘क्वारेन्टाइन अभियान नाट्य उत्सव–२०७६’ को बाह्रौं दिन मंगलबार ‘लाटीको छोरा’ प्रदर्शन हुँदैछ ।
लमजुङको सुन्दर बजारमा भएकी एक मनोरोगी महिला (लाटी) लाई समाजका मानिसले हेर्ने खराब नजर र गर्ने असमान व्यवहार नाटकको प्रमुख विषय हो । उनै लाटीको वरिपरि घुमेको कथा हो नाटक ‘लाटीको छोरा’ ।
यो नाटकमार्फत ३६ वर्षपछि नेपाली नाटकका अग्रज कलाकार टीका पहारिकले नेपाली रंगमञ्चमा पुनरागमन गरेका थिए ।
श्याम शाहको कथालाई सुलक्षण भारतीले निर्देशन गरेका हुन् ।
थिएटर मल–कीर्तिपुर रंगमञ्च र थिएटर सेन्टर फर चिल्ड्रेन (टीसीसी नेपाल) ले विश्व रंगमञ्च दिवस २७ मार्च (१४ चैत्र) बाट यस उत्सव सुरु गरेको थियो ।
नाटकको भिडियो हरेकदिन ठिक ५ बजे थिएटर मलको आधिकारिक फेसबुक पेजमार्फत लाइभ प्रदर्शन गरिनेछ ।