काठमाडौं । १३ औं दक्षिण एसियाली खेलकुद (साग) का ऐतिहासिक पदक वितेजा पुरुषोत्तम वज्राचार्यले संन्यास लिएका छन् । उनले ३७ वर्षको उमेरमा आफ्नो २३ वर्षीय लामो खेल जीवनबाट संन्यास लिएका हुन् ।
नेपालले पहिलो पटक सागमा एकल प्रतिस्पर्धामा पदक जित्दा पुरुषोत्तमले कास्य पदक दिलाएका थिए । उनी सागमा टेबलटेनिसको एतिहासमा पदक दिलाउने पहिलो खेलाडी हुन् । त्यसको केही समयपछि अर्का खेलाडी स्यान्टु श्रेष्ठले पनि एकलतर्फ काँस्य जितेका थिए । टेबलटेनिसको एकल विधामा पदक जित्ने आफ्नो सपना काँस्यमै भए पनि सफल भयो उनले बताए ।
टिम स्पर्धामा भने नेपालले पटक–पटक पदक जितेको थियो । “सागमा ऐतिहासिक पदक जितेपछि नै मैले सन्यास लिनु पर्ने थियो । त्यो नै मेरा लागि उत्तम समय थियो,” पुरुषोत्तमले बाह्ररखरीसँग भने, “तर, भोलि खेल कस्तो हुन्छ भन्ने भेउ पाउन सकेन । मनमा भने सन्यासको सोच आइसकेको थियो ।”
उनले संघ र सरकारबाट सम्मानसहित आधिकारिक विदाइको पर्खाइका कारण ढिलो भएको बताए । “टेबलटेनिस खेलाडी र संघले हालसम्म खेलाडीको ससम्मान विदाइ गरेको छैन । अन्य संघ जस्तै हाम्रो संघले पनि सम्मानसहित विदाइ गरोस् भन्ने चाहन्छु । जसले खेलकुदमा नयाँ ‘ट्रेन्ड’ ल्याओस्,” उनले भने, “संघले गर्न नचाहे पनि म आफैं आफ्नो खर्चमा कार्यक्रमसहितको विदाइ गर्नेछु ।”
उनले सोमबार विश्व टेबलटेनिस दिवसलाई मध्यनजर गर्दै सन्यासको घोषणा गरेका हुन् । पुरुषोत्तमले सोमबारको दिन टेबलटेनिका लागि सबैभन्दा उत्तम दिन भएकाले सन्यास लिने सोच बनाएको बाह्ररखरीसँग भने ।
“आजको दिन टेबलटेनिसका लागि उत्तम दिन हो । म आज कार्यक्रम सहितको विदाइ लिन सक्थें,” पुरुषोत्तमले भने, “कोरोना भाइरसका कारण सबैलाई जम्मा गर्न नसक्ने अवस्था छैन । त्यसैले कोरोना संक्रमणको प्रभाव कम भएलगतै एक कार्यक्रसहित विदाइको हात हल्लाउने छु ।”
संघका पदाधिकारीसँगको छोटो कुराकानीमा खासै कसैले खासै चासो नदिएको उनको गुनासो छ । “मैले सन्यासको विषयमा थोरै भए पनि संघका पदाधिकारीसँग कुरा गरेको थिए । तर, उनीहरुबाट खासै कुनै प्रतिक्रिया आएन,” उनले भने, “संघका अध्यक्षले कताबाट यस विषयमा सुन्नु भएछ । फोन गरेर ‘यो उत्तम समय हो । तिमीले राम्रो गर्यौ’ मात्र भन्नु भयो । मैले प्रति उत्तरमा एक कार्यक्रम गर्दै विदाइ गर्ने छु भने । संघसँग कुरा भएको मेरो यत्तिमात्र हो ।”
पुरुषोत्तमले समान तीन पटक साग र विश्व च्याम्पियनसिप तथा समान दुई पटक एसियन च्याम्पियनसिप र एसियाली खेलकुदमा सहभागिता जनाइसकेका छन् ।