एजेन्सी । विश्वभर महामारीका रूपमा फैलिएको कोरोना भाइरसले अहिले ठूलो रूप लिएको छ । कोरोना भाइरसका कारण विश्वमा हुने ठूलाखाले खेलकुद प्रतियोगिताहरू हुन सकेका छैनन् । 

कोरोना भाइरका कारण नै टोकियो ओलम्पिक पनि एक वर्ष सरेको छ । च्याम्पियन्स लिग, ला लिगा, प्रिमियर लिगजस्ता ठूला प्रतियोगिताहरू स्थगित छन् । ठूलाखाले क्रिकेट प्रतियोगिताहरू पनि स्थगित छन् । कोरोना भाइरसका कारण विश्व खेलकुद जगतमा परिवर्तन हुन सक्ने केही रोचक कुरा । 

फुटबल 
फुटबलका धेरै प्रतियोगिता सुरु हुनुभन्दा पहिले खेलाडीहरूबीच हात मिलाउने प्रक्रिया हुन्छ । कोरोना भाइरसको संक्रमण देखिएको समयमा पनि धेरैखाले प्रतियोगितामा खेलाडीहरूले हात मिलाएका थिएनन् । 

उसो त प्रतियोगिता गर्ने स्थानमा पनि खेलाडीहरूलाई हात मिलाउन दिएको थिएन । अब कोरोना संक्रमणपछि पनि यो कुरा लागु हुन सक्ने फुटबल विज्ञहरूले धारणा राखेका छन् ।

क्रिकेट 
क्रिकेट विश्वकै लोकप्रिय खेलकुदमध्ये एक हो । क्रिकेटमा बलरहरूले बललाई थुक लगाएर चम्काउने गर्छन् । क्रिकेटका विज्ञहरूले यो प्रक्रिया बन्द हुन सक्ने बताएका छन् । 

क्रिकेट खेलमा बललाई थुक लगाएर चम्काउने तरिका पहिलेदेखि नै छ । अब कोरोना भाइरसको संक्रमण नियन्त्रण भएपछि खेलाडीहरूमा यसको त्रास बाँकी रहने भएकाले बलमा थुक लगाएर चम्काउने काम भने हट्न सक्छ । 

अस्ट्रेलियाका फास्ट बलर पेट कमिन्सले भनेका छन्, “एक बलरको नाताले मलाई लाग्छ क्रिकेटमा बलरहरूले कोरोना संक्रमण अन्त्य भएपछि बलमा थुक लगाएर चम्काउन बन्द गर्ने सम्भावना धेरै छ ।”

टेनिस 
टेनिसमा खेलाडीहरूले बल ब्वाइजलाई आफ्नो तौलिया दिन्छन् । उनीहरूले आफ्नो शरीरको पसिना पुछ्न तौलिया साथमा राखेका हुन्छन् । आफ्नो शरीरको पसिना पुछेपछि खेलाडीले बल ब्वाइजलाई तौलिया दिन्छन् । 

अब यो प्रक्रिया पनि रोकिने सम्भावना छ । किनकि तौलियमा बल ब्वाइज वा खेलाडीले पसिना पुछेकाले कोरोना सर्न सक्ने डर रहन सक्छ ।