एजेन्सी । युवा गोलरक्षक आन्द्रे लुनिनले आफू स्पेनिस क्लब रियल मड्रिड फर्किन चाहेको बताएका छन् । २१ वर्षीय लुनिनले रियल फर्किएर एक नम्बर जर्सी लगाउन चाहेको बताएका छन् । 

१९ वर्षको हुँदा लुनिन सन् २०१८ मा युक्रेनको क्लब जोरिया लुहान्स्कबाट रियल पुगेका थिए । तर, उनले क्लबका लागि डेब्यु गर्न लामो समय पर्खेका छन् । उनी अझै पनि आफ्नो प्रदर्शन देखाउन अवसरको खोजीमा छन् । 

उनी सन् २०१८–१९ को सिजनमा लोनमा लेगानेस पुगेका थिए । लेगानेसमा उनले ला लिगाको मात्र ५ खेल खेल्ने अवसर पाए । त्यसपछि यस सिजनको आरम्भमा पुनः लोनमा भाल्लाडोलिड पुगेका उनी हाल लोनमा नै ओभिडोमा छन् । 

“म रियल फर्किन चाहन्छु र १ नम्बर जर्सीका लागि प्रतिस्पर्धा गर्न चाहन्छु,” लुनिनले भने, “म प्रशिक्षक जिनेदिन जिदानको निर्णयको पर्खाइमा छु । जिदान के सोच्ने छन् । मलाई आशा कि जिदानले सही निर्णय लिनेछन्,” उनले थपे, “म रियल र युक्रेन दुवैबाट उपाधि जित्न चाहन्छु । तर, त्यो सपना मात्र बनेको छ । जसका लागि म कडा मिहिनेत गर्नेछु ।”