काठमाडौं । नेपाल–भारत मानव विकास एवं मैत्री संघले सरकारलाई चिकित्सकका लागि आवश्यक व्यक्तिगत सुरक्षा सामग्री पीपीई सहयोग गरेको छ ।
सहरी विकास राज्यमन्त्री रामवीर मानन्धरले संघले उपलब्ध गराएको ३ सय थान पीपीर्ई स्वास्थ्यमन्त्री भानुभक्त ढकाललाई हस्तान्तरण गरेका हुन् । राज्यमन्त्री मानन्धरले स्वास्थ्य मन्त्रालय पुगी कोरोनाविरुद्धको स्वास्थ्य उपचारमा संलग्न चिकित्सकका लागि आवश्यक व्यक्तिगत सुरक्षा सामग्री (पीपीई) मन्त्री ढकाललाई हस्तान्तरण गरेका हुन् । पीपीई सेट हस्तान्तरण गर्दै राज्यमन्त्री मानन्धरले संघलाई धन्यवाद दिए । उनले विपतको समयमा आ–आफ्नो स्थानबाट सक्दो सहयोग गर्न सबैलाई आह्वान पनि गरे ।
स्वास्थ्य तथा जनसंख्या मन्त्री ढकालले कोरोना संक्रमणको उपचारमा अत्यन्तै महत्त्वपूर्ण स्वास्थ्य सामग्री पीपीईले उपचारमा खटिएका स्वास्थ्यकर्मीको मनोबल बढाएर उत्साहित बनाउन सहयोगी भूमिका निर्वाह गर्ने बताए । उनले सरकारले टेकुमा मात्रै रहेको प्रयोगशाला विस्तार गरी प्रदेश प्रदेशमा पुर्याएको र अझै पनि आवश्यक सामग्रीहरू पुर्याउने क्रममा रहेको उल्लेख गर्दै संकटका बेला हिलो छ्याप्ने काम छोडी महामारीविरुद्ध हातेमालो गर्न सबैलाई आह्वान गरे ।
उनले भने, “अभावै अभावले छटपटिराखेका बेलामा सातवटै प्रदेशमा सामग्री पुर्याइएको छ । हाम्रा आग्रह पूर्वाग्रह, हिलो छ्याप्ने कुराभन्दा माथि उठेर यो महामारीविरुद्ध हातेमालो गरेर सबैलाई एकसाथ लड्न म हार्दिक आह्वान गर्न चाहन्छु ।” पीपीई सेटमा गाउन, भाइजर, पञ्जा, एप्रोन, मास्कलगायत सामान छन् ।