काठमाडौं । महिलामाथिको विभेद एक्काइसौं शताब्दीमा मात्रै हौइन पौराणिक कालदेखि नै सुरु भएको थियो । यहि विभेदको शृङ्खला र विद्रोहको रुप हो ‘अर्को कुरुक्षेत्र’ ।
यो सम्पदा मल्लको कथा र अशेष मल्लको निर्देशनमा तयार भएको नाटक हो । जसमा अभिनेत्री उषा रजक करिब एक दशकपछि रंगमञ्चमा फर्किएकी हुन् ।
यही नाटक हाल जारी ‘क्वारेन्टाइन अभियान नाटक महोत्सव’को दसौं दिन आज प्रदर्शन हुँदै छ । यो नाटक यसअघि सर्वनाम थिएटरमा मञ्चन भइसकेको छ ।
लकडाउनको समयमा सरकारलाई हातेमालो गर्न र दर्शकलाई रंगमञ्च र नाटकबाट टाढा हुन नदिन यस भर्चुअल नाटक उत्सवको आयोजना गरिएको हो ।
थिएटर मल–कीर्तिपुर रंगमञ्च र थिएटर सेन्टर फर चिल्ड्रेन (टीसीसी नेपाल) ले संयुक्त रूपमा आयोजना गरेको यस महोत्सवमा फेसबुक लाइभमार्फत नाटकको भिडियो प्रस्तुत गरिन्छ ।
हरेक दिनजस्तै दिउँसको ठीक ५ बजे थिएटर मलको आधिकारिक फेसबुक पेजमा नाटक हेर्न सकिन्छ ।