एजेन्सी । पूर्व आयाक्स तथा टोटनहामका स्ट्राइकर अहमद होसामले जिनेदिन जिदानको रियल फिर्तापछि क्लबमा कुनै विषय नथपिएको बताएका छन् ।

रियल छाड्नुपूर्वको प्रदर्शन हाल क्लबको नभएको भन्दै होसामले जिदानको खिल्ली उडाएका हुन् । जिदानले सन् २०१८ मा एक नाटकीय रूपमा रियल मड्रिड छाड्न पुगेका थिए । लगातार तीन सिजन च्याम्पियन्स लिगको उपाधि दिलाउँदै उनले रियलको प्रशिक्षण छाडेका थिए ।

त्यसपछि क्लबले स्पेनिस प्रशिक्षक जुलेन लोपेटेगुई र सान्टियागो सोलारीलाई प्रशिक्षकमा नियुक्त गरेको थियो । तर, दुवै प्रशिक्षक असफल भएपछि क्लबले जिदानलाई पुनः रियलमा फर्काएको हो । 

जिदान फर्केपछि रियल पछिल्लो सिजन च्याम्पियन्स लिगको प्री–क्वार्टरफाइनलबाट बाहिरिएको थियो भने ला लिगाको शीर्ष तीनमा रह्यो । उनी सन् २०१९ को मार्चमा पुनः रियल फर्किएका थिए । 

जारी सिजनको च्याम्पियन्स लिगको शीर्ष १६ को पहिलो लेगमा रियल प्रिमियर लिग क्लब म्यानचेस्टर सिटीसँग २–१ ले पछि परेको छ । तर, दोस्रो लेग भने कोरोना भाइरसका कारण स्थगित हुन पुग्यो । होसाम रियलका ठूलो प्रसंशक भएको बताइएको छ । तर, जिदानको पुनरागमन असफल रहेको होसामको दाबी छ । 

“म वास्तवमा रियलको प्रसंशक हुँ । लिगमा रियल मेरो मन पर्ने क्लब हो । तर, मेरो नजरमा जिदानले क्लबमा पुनरागमन पछि कुनै थप नतिजा ल्याएका छैनन्,” होसामले भने ।
पछिल्लो वर्ष क्लबमा फर्केसँगै जिदानले रियललाई पुनः सफल बनाउने इच्छा व्यक्त गरेका थिए ।